काठमाडौँ – अन्तरिम सरकारका प्रधानमन्त्री सुशीला कार्कीले आफू पदको रसस्वादन गर्न सत्तामा नआएको र ६ महिनाभित्र चुनाव गरी दायित्व सुम्पिने अठोट सुनाएको छिन् ।

जेन-जी प्रदर्शनको बलमा प्रधानमन्त्री नियुक्त कार्कीले आइतबार सिंहदरबारमा पदभार ग्रहण गर्दै सरकारी अधिकारीहरूसँग साथ र सहयोग पनि मागेकी छिन् ।

‘जुन परिस्थितिमा म आएँ – कुनै रहरले म आएको होइन । सडकबाट, जताततैबाट मलाई फलानालाई सुशीला कार्कीलाई जिम्मा देऊ भनेर आवाज उठ्यो । मैले पनि विवश हुनुपर्‍यो’, कार्कीले भनिन्‌, ‘जहाँसम्म मेरो जुन टीम छ, टीमले जुन काम गरिराछ – हामी कुनै सत्ताको या पदको रसस्वादन गर्न आएको होइन । मेरो उमेर पनि त्यो होइन ।’

आफूहरूलाई खोजिएकाले यो बेलामा किन सेवा नगर्ने भनी सक्दो छिटो ६ महिनामात्र अवधि लिएर सरकारमा आएको उनले बताइन्‌ ।

‘त्यो भन्दा बढी नबस्ने ! कुनै हालतमा पनि हामीले आफ्ना कामकारबाही पूरा गरेर हामी मुक्त हुने र नयाँ आउने संसद्‌ र नयाँ आउने मन्त्रीहरूलाई जिम्मेवारी र दायित्व सुम्पिने हामीले अठोट गरेका छौँ’, कार्कीले भनिन्‌ ।

यो अठोट पूरा गर्न सबैको सहयोग अपेक्षा गर्दै कार्कीले आग्रह गरिन्‌, ‘त्यसैले मलाई सहयोग गर्नुस्‌ ।’