काठमाडौँ – प्रधानमन्त्री सुशीला कार्कीले भदौ २३ र २४ गते भएको जेनजी प्रदर्शनका क्रममा देशका अत्यावश्यक संस्थाका कार्यालय र फाइल नष्ट गर्न योजनावद्ध षडयन्त्र भएको आफूलाई लागेको बताएकी छिन्‌ ।

अहिले सिंहदरबारमा भइरहेको पदभार तथा परिचयात्मक कार्यक्रममा बोल्दै अन्तरिम सरकारकी प्रमुख कार्कीलेउ मुलुकलाई जुनजुन संस्था अन्त्यन्त आवश्यक संस्थाहरूमै छानिछानी प्रहार भएको बताइन्‌ ।

भदौ २३ गते भएको जेनजी प्रदर्शनमा सरकारले दमन गरेपछि भोलिपल्ट २४ गते निस्किएको अनियन्त्रित प्रदर्शनको मौका छोपी अराजक समूहले देशभर न्यायालय, सुरक्षा कार्यालय र सार्वजनिक तथा निजी सम्पत्तिमा आगजनी गरेको थियो ।

‘यसपल्टको यो जुन हत्या हिंसा भयो, यो मुलुकको अत्यन्त आवश्यक जुन संस्थाहरू छ, त्यसमा छानिछानी प्रहार भएको छ । प्रहरीहरू सुरक्षाका लागि अनिवार्य छ, तिनलाई प्रहार भयो’, कार्कीले भनिन्‌, ‘प्रहरी बीट र कार्यालय जले, अदालतका फाइलहरू नष्ट भएर गयो । हाम्रै सिंहदरबारभित्रका पनि कयौँ त्यस्तो पुराना फाइलहरू नष्ट भएर गयो । बडो आश्चर्यको कुरा छ कि किन यसरी देशका अत्यन्त आवश्यक संस्थाहरू, सिंगो देशको शासन चलाएको छ, ती भवनहरू र ती मिसिल, ती कागजहरू नष्ट भयो । यो देखेर मलाई अलिकति लाज पनि लागेको छ ।’

कार्कीले थपिन्‌, ‘नेपाली नै भएर यो काम गरेको हो भने तिनलाई नेपाली कसरी भन्ने ? मान्छेले ज्यान मार्छ, भवनहरू लुट्ला, भत्काउला बेग्लै ! तर यो घटना त मलाई लाग्छ – यो देशमा पहिलोचोटी भएको हो । हाम्रा संस्थाहरू अनुहार देखाउन नसक्ने अवस्थामा पुर्‍याएर गरेको छ । मलाई त जहाँसम्म लाग्छ – यो एउटा योजनावद्ध रूपमा षडयन्त्र नै भएको हो कि ! यो अनुसन्धान हुन बाँकी छ ।’