काठमाडौं- प्रहरीले लागूऔषध खैरोहिरोइनसहित काठमाडौं, धादिङ र सिराहाबाट चार जनालाई पक्राउ गरेको छ ।

चन्द्रागिरी नगरपालिका-२ नागढुङ्गाबाट १ ग्राम खैरो हेरोइनसहित रूपन्देहीको बुटवल-११ का अभिशेक श्रेष्ठलाई सोमबार बिहान पक्राउ गरेको हो । प्रहरी प्रभाग नागढुङ्गा र लागूऔषध नियन्त्रण ब्यूरो शाखा कार्यालय नागढुङ्गाबाट खटिएको प्रहरीले काँकरभिट्टाबाट काठमाडौंतर्फ आउँदै गरेको बा प्र.०१-००६ ख ४७९६ नम्बरको बसलाई जाँच गर्ने क्रममा बसमा सवार श्रेष्ठलाई उक्त पदार्थ सहित फेला पारेको प्रहरीले जनाएको छ ।

यस्तै सिराहा गोलबजार नगरपालिका-३ जम्दहबाट खैरो हेरोइन जस्तो देखिने पदार्थ ६० मिलिग्रामसहित दुई जनालाई सोमबार बिहान प्रहरीले पक्राउ गरेको छ । पक्राउ पर्नेहरूमा स्थानीय जयकुमार नायक र मिर्चैया नगरपालिका-७ का रंजितकुमार मण्डल छन् ।

त्यसैगरी धादिङ बेनीघाट रोराङ गाउँपालिका-२ आँपटारबाट १ सय ४३ किलो ८ सय ४० ग्राम गाँजासहित भारत बिहार मोतिहारी थाना रक्सोल नोइपाढीह-४ सहदेवाका सरहज मियाँलाई सोमबार बिहान प्रहरीले नियन्त्रणमा लिएको छ ।

इलाका प्रहरी कार्यालय गजुरी र प्रहरी चौकी ताल्तीबाट खटिएको प्रहरीले कान्द्राङगढीबाट मलेखुतर्फ आँउदै गरेको बिआर ०६ पिसि ११६७ नम्बरको गाडीलाई जाँच गर्दा उक्त परिमाणको गाँजा फेला पारी चालक मियाँलाई पक्राउ गरेको प्रहरीले जनाएको छ । यस सम्बन्धमा प्रहरीले आवश्यक अनुसन्धान गरिरहेको प्रहरी प्रधान कार्यालयले जनाएको छ ।