काठमाडौं- प्रधानमन्त्री केपी शर्मा ओलीले आफ्नो वाचाअनुसार त्रिवि क्रिकेट मैदानमा फ्लडलाइट र प्याराफिट जडानको काम द्रूत गतिमा भइरहेको बताएका छन् ।

सोमबार नेकपा माओवादी केन्द्रका अध्यक्ष पुष्पकमल दाहाल प्रचण्डले प्रमुख प्रतिपक्षी नेताका रुपमा संसद्मा बोल्दै तीन सय दिनमा बनाइसक्ने भनेको फ्लड लाइट र प्याराफिट अझै तयार नभनेको बताएका थिए ।

यसैलाई लिएर ओलीले सामाजिक सञ्जालमार्फत् प्रचण्डलाई जवाफ फर्काएका हुन् । ‘पूर्वप्रधानमन्त्री पुष्पकमल दाहालजीले आज प्रश्न सोध्नु भएछ– कीर्तिपुरको मैदानमा खोई फ्लडलाइट ? खोई प्याराफिट ?’, उनले भनेका छन्, ‘उहाँलाई मेरो आग्रह छ, बनिरहेको प्याराफिट हेर्न जानुस्, जडान हुँदै गरेको फ्लडलाइटका पोल हेर्न जानुस्, बनिरहेको छ ।’

उनले प्रचण्डलाई उनी प्रधानमन्त्री हुँदा कुनै पनि कामलाई टाइमलाइन तोकेर गर्छु नभनेको बताए । ‘तपाईंले केही गर्नु पनि परेन र गर्नु पनि भएन । सरकारको कामबारे तथ्यतथ्यांक राखेर तपाईंले प्रधानमन्त्रीको रुपमा जवाफ पनि दिनु परेन’, उनले भने, ‘तपाईंका त न कुनै वाचा, न कुनै निर्णय, न कुनै संकल्प, न कुनै काम ।’

ओलीले आफू प्रधानमन्त्री भएपछि दिनै तोकेर केही गर्न खोजेको बताएका छन् । ‘मैले त दिन तोकेर गर्छु भनेँ, आफैंमाथि प्रश्न आह्वान गरेँ र काम पनि गरेँ’, ओलीको तर्क छ, ‘तपाईंले जर्जर छोडेको अर्थतन्त्र अहिले कहाँ पुग्यो ? तथ्याङ्क हेर्नुस् भन्ने सुझाव दिन चाहन्छु ।’