काठमाडौं– सत्ता साझेदार नेपाली कांग्रेसका महामन्त्री गगनकुमार थापाले प्रधानमन्त्री केपी शर्मा ओलीसँग सामान्य प्रशासनमन्त्री राजकुमार गुप्तलाई तत्काल बर्खास्त गर्न सुझाव दिएका छन् । 

कांग्रेसको केन्द्रीय पेशागत तथा बुद्धिजीवी विभागले सोमबार नेपाल प्रज्ञा प्रतिष्ठानमा आयोजना गरेको ‘नेपालमा विपद जोखिम व्यवस्थापन : चुनौती, अवसर र भावी कार्यदिशा’ विषयक छलफल कार्यक्रममा यस्तो सुझाव दिएका हुन् । 

‘कार्यक्रममार्फत् बाटै म प्रधानमन्त्रीलाई अनुरोध गर्छु– तपाईंले तत्काल तपाईंको मन्त्रीलाई बर्खास्त गर्नुस्,’ महामन्त्री थापाले भने, ‘यो विषयको छानबिन गर्ने कुरालाई सहज बनाउनुस् ।’

उनले सामान्य प्रशासनमन्त्री गुप्तालाई बर्खास्तमात्रै गरेर नहुने पनि स्पष्ट पारे । ‘बर्खास्त गरेरमात्रै हुँदैन, यत्तिको कुरा आइसकेपछि यसको दूधको दूध, पानीको पानी हुनुपर्छ,’ थापाले भने, ‘यसको छानबिन हुनुपर्छ । र, यसमा देखिएका, संलग्न भएका अरु को–को छन्, कोही छन् भने कारबाही हुनुपर्छ ।’

उनले आफू देशबाहिर रहेका बेला मन्त्रीको अडियो कान्ड बाहिरिएको र त्यो कान्ड आइसकेपछि आफूलाई प्रधानमन्त्री ओलीले मन्त्रीलाई बर्खास्त गर्लान् भन्ने अनुमान गरेको पनि सुनाए ।  

‘म त्यहाँ (विदेश) भएको बेलामा सरकारमाथि ठूलो आपत आएछ । एकजना मन्त्रीजीको अडियो कान्ड आएको कुरा यहाँ सुन्यौँ हामीले । बहालवाला मन्त्रीको यत्तिको विषय आइसकेपछि, ती मन्त्रीले गल्ती गरेका होइनन् भने तुरुन्त राजीनामा दिएर ममाथि छानबिन होस् भन्थे होलान् भन्ने मेरो अनुमान,’ थापाले भने, ‘मन्त्रीले त्यति नभनिसकेपछि प्रधानमन्त्रीले तुरुन्त बर्खास्त गरिहाल्नुहोला भन्ने मेरो अपेक्षा थियो । यसका बारेमा टिप्पणी नै गर्न पर्दैन होला भन्ने लागेको थियो । तर, टिप्पणी गर्नुपर्ने अवस्था आयो ।’