महेन्द्रनगर– जिल्ला प्रशासन कार्यालय कञ्चनपुरले स्थानीय तहहरूलाई ‘छाउगोठ’ भत्काउने अभियान सञ्चालन गर्न आग्रह गरेको छ । स्थानीय प्रशासनले सोमबार पत्र पठाएर कञ्चनपुरका नौवटै पालिकाहरूलाई ‘छाउगोठ’ भत्काउने अभियान सञ्चालन गर्न आग्रह गरेको हो । 

प्रमुख जिल्ला अधिकारी लक्ष्मण ढकालद्वारा हस्ताक्षरित पत्रमा भनिएको छ, ‘यस जिल्लाका नौवटै स्थानीय तहमा छाउपडी गोठ भत्काई परम्परागत रुपमा चलिरहेको कुप्रथा उन्मूलन गर्न विशेष अभियान सञ्चालन गर्नुपर्ने आवश्यकता देखिएकाले तहाँ पालिकाबाट आवश्यक निर्णय गरी यो सामाजिक कुप्रथा अन्त्य गर्न छाउगोठ भत्काउने अभियान सञ्चालन गर्नु-गराउनु हुन अनुरोध छ ।’

शनिबार राती कृष्णपुर नगरपालिका–१ मा पर्ने निगाली टोलमा महिनाबारीको समयमा ‘छाउपडी’ गोठमा सुतिरहेकी २८ वर्षीया कमला दमाईको सर्पको टोकाइबाट मृत्यु भएको थियो । 

सर्पदंशबाट कमलाको मृत्यु भएपछि आइतबार कृष्णपुर नगरपालिकाले सूचना जारी गरेर १५ दिनभित्र नौवटै वडामा रहेका ‘छाउपडी’ गोठ अनिवार्य भत्काउन आग्रह गरेको थियो ।