काठमाडौं– संयुक्त राज्य अमेरिकाको दक्षिणी क्षेत्रमा पर्ने केन्टकीको एउटा चर्चमा एक बन्दुकधारीले दुई महिलाको हत्या गरेका छन् ।

यस्तै विमानस्थल बाहिर एक राज्य सैनिकलाई गोली हानी घाइते बनाएको समाचार संस्था ¥युटर्सले जनाएको छ ।

बन्दुकधारीलाई प्रहरीले गोली हानी मार्न सफल भएको अधिकारीहरूले बताएका छन् । लेक्सिंगटनको रिचमन्ड रोड ब्याप्टिस्ट चर्चमा ती महिलाहरूको हत्या भएको थियो ।

त्यहाँ दुई पुरुष पनि घाइँते भएका थिए । जसमा एक जनाको अवस्था गम्भीर रहेको लेक्सिंगटनका प्रहरी प्रमुख लरेन्स वेदर्सले पत्रकार सम्मेलनमा जानकारी दिएका छन् । अधिकारीहरूले संदिग्ध व्यक्तिको नाम वा उमेर भनेका छैनन् ।

‘आज जस्तो दिनहरू अत्यन्तै कठिन हुन्छन्,’ वेदर्सले भने, ‘कहिलेकाहीँ यस्ता घटनाहरू हुन्छन् कि तपाईंसँग कुनै कारण हुँदैन ।’ उनले थपे, ‘फेयेट काउन्टीमा बिहान ११ः३० बजे ब्लू ग्रास विमानस्थल नजिकै रोकिएपछि संदिग्धले सैनिकमाथि गोली चलाएको थियो ।’

प्रहरीका अनुसार गोलीबारी विमानस्थल नजिकैको सडकमा भएको थियो । ती सैनिकको नजिकैको अस्पतालमा उपचार भइरहेको थियो र उनको अवस्था स्थिर थियो ।

त्यसपछि संदिग्ध व्यक्तिले विमानस्थलबाट करिब १० माइल (१६ किलोमिटर) टाढा रहेको गाडी चोरी गरे र रिचमन्ड रोड ब्याप्टिस्ट चर्चतिर भागे । जहाँ ती व्यक्तिले चर्च परिसरमा रहेका मानिसहरूमाथि गोली चलाउन थाले ।