एजेन्सी – पाकिस्तानी रेञ्जर्सले बन्दी बनाएका भारतीय सीमा सुरक्षा बल (बीएसएफ) जवान पूर्णम कुमारलाई फिर्ता पठाएको छ ।

पूर्णम अप्रिल २३ मा पाकिस्तानी विशेष सुरक्षा दस्ताको नियन्त्रणमा परेका थिए । पञ्जाबको अटारी बोर्डरबाट उनी समातिएका थिए । यसबीच उनी पाकिस्तानी हिरासतमै थिए ।

भारतीय बीएसएफद्वारा जारी विज्ञप्तिमा लेखिएको छ, ‘अप्रिल २३, २०२५ देखि पाकिस्तानी रेञ्जर्सको हिरासतमा रहेका बीएसएफ जवान पूर्णम कुमारलाई संयुक्त चेक पोष्ट अटारी, अमृतसरमा करिब १०:३० बजे भारतलाई सुम्पिइएको छ ।’

शान्तिपूर्ण विधि र स्थापित प्रोटकल अनुसार बन्दी हस्तान्तरण भएको भारतीय पक्षले जनाएको बीबीसी हिन्दीले लेखेको छ ।

अप्रिल २२ मा भारत प्रशासित जम्मू कश्मीरको पहलगाममा चरमपन्थी हमला भएको थियो । उक्त हमलापश्चात भारत र पाकिस्तानबीच तनाव बढेको थियो ।

मे ७ मा पाकिस्तानमाथि भारतले हवाई हमला गरेपछि दुवै पक्षबीच हानाहान सुरु भएको थियो । मे १० मा दुई देशबीच सङ्घर्षविराममा सहमति जुटेको थियो ।

हाल दुबै देशका संस्थापन द्विपक्षीय तनाव कम गर्ने प्रयासमा छन्‌ ।