काठमाडौं – गत पुस २६ बाट प्रदर्शनमा आएको फिल्म ‘कार्साङ’का निर्देशक यम शेर्पाले नयाँ फिल्म ‘मिरमिरे’ निर्देशन गर्ने भएका छन् । उनको निर्देशन रहने यो दोस्रो फिल्म हो ।

नयाँ वर्षको अवसर पारी निर्देशक शेर्पाले दोस्रो फिल्म निर्माणको घोषणा गरेका हुन् । फिल्मको थिम पोस्टर सार्वजनिक गरी उनले यही वर्ष फिल्म प्रदर्शनमा आउने जानकारी समेत दिएका छन् ।

पोस्टरमा एक महिला र एक पुरुष पहाडमा उभिएका छन् । उनीहरुको पृष्ठभूमिमा उदाउँदो सूर्य छ । थिम पोस्टरले फिल्म ग्रामीण कथामा बन्ने सङ्केत गर्छ ।

निर्देशक शेर्पाका अनुसार यो फिल्म सामाजिक कथामा बन्न लागेको हो । अहिले कलाकार चयनको काम भने बाँकी रहेको निर्देशक शेर्पाले बताए ।

उनले भने, ‘कलाकार चयनको काम चाँडै हुन्छ र हामी सार्वजनिक गर्दै जानेछौं ।’

फिल्मको लेखक निर्देशक शेर्पा आफैँ हुन् । निर्माताहरू भने निमु शेर्पा र चोङ्वा लामा हुन् ।