काठमाडौं– नेपाली कांग्रेसका सांसद राजेन्द्र बजगाईंले संस्कृति, पर्यटन तथा नागरिक उड्डयनमन्त्री बद्री पाण्डेमाथि कारबाहीको माग गरेका छन् ।
 
उनले लिखित पत्रमार्फत पार्टीको केन्द्रीय अनुशासन समितिसँग पार्टीका सहमहामन्त्रीसमेत रहेका मन्त्री पाण्डेमाथि कारबाहीको माग गरेका हुन् ।
  
सांसद बजगाईंले मन्त्री पाण्डेमाथि संविधान र पार्टी सिद्धान्तको उल्लङ्घन गरेको, पार्टी विधानको उल्लङ्घन गरेको र राष्ट्र र लोकतन्त्रप्रति गैर जिम्मेवार अभिव्यक्ति दिएको आरोप लगाएका छन् ।  

यस्ता छन् बजगाईंले लगाएका आरोपहरू :

१. संविधान र पार्टी सिद्धान्तको उल्लङ्घन 
मन्त्री बद्री पाण्डेले हालै पशुपतिनाथ मन्दिर प्राङ्गणमा निरुत्साहन अभिव्यक्ति र एक सार्वजनिक कार्यक्रममा एकदलीय चिनियाँ शासन प्रणालीका राष्ट्रपति सी जिनपिङको नैतिकतालाई नेपालको बहुदलीय लोकतान्त्रिक प्रणालीका नेताहरू र जनतासमक्ष लैजानुपर्ने धारणा व्यक्त गरेका छन् । 

नेपाली कांग्रेस जसले प्रजातन्त्र, लोकतन्त्र र बहुदलीय गणतन्त्रको रक्षा गर्दै आएको छ, त्यसका एक जिम्मेवार मन्त्रीबाट यस्तो अभिव्यक्ति आउनु पार्टी सिद्धान्तविपरीत मात्र नभई नेपालको संविधान र राष्ट्रिय हित विपरीतसमेत रहेको देखिन्छ । 

२. पार्टी विधानको उल्लङ्घन 
नेपाली कांग्रेसको विधानले समाजवाद उन्मुख बहुदलीय लोकतन्त्रलाई आत्मसात् गर्छ भने एकदलीय शासन व्यवस्थाको समर्थन कुनै हालतमा हुन सक्दैन । पार्टीका एक वरिष्ठ नेता एवं मन्त्रीबाट साम्यवादी एकदलीय प्रणालीको गुणगान गाउनु पार्टी विधानको गम्भीर उल्लङ्घन हो । 

३. राष्ट्र र लोकतन्त्रप्रति गैर जिम्मेवार अभिव्यक्ति 
मन्त्री पाण्डेको अभिव्यक्ति प्रजातन्त्रप्रति अपमानजनक मात्र नभई नेपालको लोकतान्त्रिक प्रणालीलाई चीनको एकदलीय शासन मोडलतर्फ धकेल्ने दुष्प्रयास समेत हो । यो अभिव्यक्ति पार्टीकै सहमहामन्त्रीबाट आएको हुनाले यसले पार्टीको नीति र विचारधारामा गम्भीर असर पार्ने सम्भावना छ । 

‘उपरोक्त विषयलाई ध्यानमा राख्दै नेपाली कांग्रेस केन्द्रीय अनुशासन समितिलाई सहमहामन्त्री मन्त्री बद्री पाण्डेविरुद्ध अनुसन्धानात्मक छानबिन गरी यथाशीघ्र कारबाही गर्न अनुरोध गर्दछु,’ सांसद बजगाईंले पत्रमा भनेका छन् ।