काठमाडौं– एमाले निकट कर्मचारी संगठन महाधिवेशन चुनावी चरणमा प्रवेश गरेको छ । लामो समयसम्म प्रयास गरिएको सहमतिको प्रयास असफल भएपछि अध्यक्षका प्रत्याशी रेवन्त गौतमको प्रस्तावअनुसार संगठन चुनावी प्रक्रियामा अगाडि बढेको हो ।

संगठनको अध्यक्षका आकांक्षी भवानी दाहालले पछिल्लो समयसम्म सहमतिमा नेतृत्व चयन हुनुपर्ने र रेवन्त गौतमले चुनावी प्रतिस्पर्धा हुनुपर्ने माग राख्दै आएका थिए । बुधबार राष्ट्रिय सभागृहमा प्रधानमन्त्री तथा एमाले अध्यक्ष ओलीले उद्घाटन गरेको संगठनको महाधिवेशनमा आजै रातिसम्म मतदान हुने भएको छ ।

जसअनुसार अन्तिम नामावली अहिले २ः३० बजे प्रकाशन भइसकेको छ । अब ३ बजेदेखि ५ बजेसम्म उम्मेदवारहरूले उम्मेदवारी दिने, ६ देखि ७ बजेसम्म उम्मेदवारहरूको पहिलो नामावली प्रकाशन गर्ने र ७ बजेदेखि ७ः३० बजेसम्म उम्मेदवारको विरोधमा उजुरी दिने तालिका प्रकाशन गरिएको छ ।

त्यस्तै, ७ः३० देखि १० बजेसम्म उम्मेदवारले उम्मेदवारी फिर्ता लिने र राति ११ बजे उम्मेदवारको अन्तिम नामावली प्रकाशन गरिने तालिका सार्वजनिक भएको छ । उम्मेदवारको अन्तिम नामावली सार्वजनिक भएपछि मतदान सुरु हुने सार्वजनिक तालिकामा उल्लेख छ ।