काठमाडौं– नेपालमा पुस महिनाको तुलनमा माघमा घरजग्गा कारोबार खस्किएको छ । मंसिर महिनाको तुलनामा पुस महिनामा सो क्षेत्रको कारोबार वृद्धि भएकोमा पुसमा फेरि न्यून भएर सरकारको राजस्व आम्दानी समेत खुम्चिएको हो ।

माघ महिनामा देशै भरी ४३ हजार १४० वटा घरजग्गाको लिखत पारित भएको भूमि व्यवस्थापन तथा अभिलेख विभागले जनाएको छ । सो अवधिमा सबैभन्दा धेरै घरजग्गाको कारोबार समग्र जिल्लाको हिसाबले मोरङ जिल्लामा भएको छ । जबकि पुस महिनामा देशै भरी ४८ हजार १५६ वटा घरजग्गाको लिखत पारित भएको थियो ।

माघ महिनामा मोरङ जिल्लाका ३ वटा मालपोत कार्यालयमार्फत सबैभन्दा धेरै २८१६ वटा घरजग्गाको कारोबार भएको छ भने सबैभन्दा कम मनाङ र मुस्ताङ जिल्लामा ५/५ वटा कारोबार भएको छ ।

माघ महिनामा भूमिसुधार तथा मालपोत कार्यालय इनरुवा सुनसरीबाट सबैभन्दा धेरै अर्थात् १७०४ वटा कारोबार भएको छ भने मालपोत कार्यालय बाणगंगा, बोडगाउँ कपिलवस्तुमा शुन्य कारोबार भएको छ ।

घरजग्गा कारोबारबाट माघ महिनामा सरकारले १ अर्ब ४५ करोड ५५ लाख ८८ हजार २०९ रुपैयाँ पुँजीगत लाभकर आम्दानी गरेको छ । जुन अघिल्लो महिनाको तुलनामा झण्डै १५ करोडले कमी हो ।

माघ महिनामा सरकारले घरजग्गा कारोबारबाट ३ अर्ब ८७ करोड २४ लाख ८१ हजार ६४७ रुपैयाँ कुल राजस्व आम्दानी गरेको छ । जबकि अघिल्लो महिना पुसमा सरकारले घरजग्गा कारोबारमार्फत ४ अर्ब २५ करोड २२ लाख २१ हजार ७८९ रुपैयाँ राजस्व र १ अर्ब ६० करोड ८३ लाख २८ हजार १७२ रुपैयाँ पुँजीगत लाभकर आम्दानी गरेको थियो ।

सरकारले घरजग्गा कारोबारबाट चालु आवको साउन महिनामा १ अर्ब ३४ करोड ६९ लाख, भदौ महिनामा १ अर्ब १३ करोड १५ लाख, असोज महिनामा १ अर्ब ११ करोड ६२ लाख, कात्तिक महिनामा ९३ करोड ७७ लाख र मंसिर महिनामा १ अर्ब ३१ करोड ६३ लाख रुपैयाँ पुँजीगत लाभकर आम्दानी गरेको थियो ।