काठमाडौं – पाकिस्तानको खैबर पख्तुनख्वा प्रान्तको डेरा इस्माइल खाँ क्षेत्रबाट १६ जना आणविक इन्जिनियर अपहरणमा परेका छन् । डेरा इस्माइल खाँको लक्की मरवतमा रहेको युरेनियम खानीबाट उनीहरु अपहरणमा परेका हुन् ।

अपहरणमा परेकाहरु पाकिस्तानको आणविक ऊर्जा आयोगका कर्मचारी रहेको भ्वाइस अफ अमेरिकाले जनाएको छ । मिनिबसमा यात्रा गरिरहेका बेला बन्दुकधारीको समूहले उनीहरुलाई नियन्त्रणमा लिएको त्यस क्षेत्रका प्रहरी अधिकारी मोहम्मद इजाजले जनाएका छन् ।

अपहरणको जिम्मेवारी पाकिस्तानमा सक्रिय तहरिक ए तालिबान पाकिस्तान नामक समूहले लिएको छ । उक्त समूहले भिडियो जारी गर्दै अपहरणको जिम्मेवारी लिएको हो ।

प्रहरीकाले सुरक्षा कारवाही गरी अपरहणमा परेकामध्ये ८ जनालाई मुक्त गरेको जनाइएको छ । सुरक्षा कारवाहीका क्रममा रिहा भएकामध्ये तीन जना घाइते भएको र एक जनाको अवस्था गम्भीर छ ।