काठमाडौं- तराई मधेसकेन्द्रित दलहरूले लुज-एयलाइन्स बनाउने सहमति गरेका छन् ।

संघीय संसद्‍का र बाहिर रहेका तराई-मधेसकेन्द्रित दलहरूले लुज-एयलाइन्स बनाउने सहमति गरेको जनमत पार्टीका प्रवक्ता शरदसिंह यादवले बताए ।

‘मंगलबार काठमाडौंमा बसेको बैठकमा लुज-एयलाइन्स बनाउने सहमति भएको छ । यसका थप उद्देश्य र प्राथमिकता निर्धारण गरेर मोर्चासम्म पनि पुग्न सक्छ’, जनप्रगतिशील पार्टीका उपाध्यक्ष शिवजी यादवले भने, ‘आजको बैठक फलदायी भएको छ । अब आ-आफ्ना अध्यक्षसँग छलफल गरेर दुई हप्तापछि फेरि बस्ने निर्णय गरेका छौँ ।’

यादवका अनुसार आफ्ना-आफ्ना पार्टीमा विभिन्न दलका नेताहरू सहभागी भएर मोर्चाको खाका, उद्देश्य र साझा एजेन्डाबारे छलफल गर्ने सहमति समेत जुटेको छ ।

मंगलबारको बैठकमा जनता समाजवादी पार्टीबाट रेणु यादव र मोहम्मद ईस्तियाक राई, लोकतान्त्रिक समाजवादी पार्टीबाट जितेन्द्र सोनल, सुरेन्द्र झा, जनमत पार्टीबाट शरद यादव, जनप्रगतिशील पार्टीबाट शिवजी यादव, राष्ट्रिय मुक्ति पार्टीबाट केशव झा, तराई मधेस लोकतान्त्रिक पार्टीबाट वृषेश चन्द लाल सहभागी थिए ।

यस्तै उपेन्द्र यादवको जसपा नेपालबाट राजकिशोर यादव सहभागी हुने भनिए पनि भारत गएकाले सहभागी भएनन् ।

तर उनीहरूको पार्टी लुज-एलाइन्समा सहभागी हुने निर्णय गरिरहेको छ । यस्तै प्रभु साह नेतृत्वको आमजनतासँग पनि लुज-एलाइन्सबारे छलफल भइरहेको संयोजक यादवले बताए ।

त्यसैगरी, बैठकमा स्वतन्त्र संसद् अमरेशकुमार सिंह पनि सहभागी थिए । उनी लुज-एयलाइन्स बनाउने कुरामा सकारात्मक छन् । यता रेशम चौधरी नेतृत्वको नागरिक उन्मुक्ति पार्टीबाट कोही सांसद र नेता सहभागी थिएनन् ।