सिन्धुपाल्चोक- प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले केपी शर्मा ओली नेतृत्वको वर्तमान सरकारको आयु धेरै लामो नभएको दाबी गरेका छन् ।

मंगलबार प्रेस सेन्टर सिन्धुपाल्चोकको पत्रकार सम्मेलनलाई सुनकोशीस्थित सुकुटे बिचमा सम्बोधन गर्दै उनले यस्तो बताएका हुन् ।

वर्तमान सरकार अप्राकृतिक रुपले बनेकाले यसको आयु लामो नभएको उनले दाबी गरेका हुन् ।

सरकारको आफ्नै क्रियाकलापले आयु घटाइरहेको दाहालको जिकिर थियो । नेपाली कांग्रेस र नेकपा एमाले मिलेर गत असार ३० गते बनेको वर्तमान सरकार ढाल्न माओवादीलगायतका दलहरूले बल गर्नै नपर्ने दाहालले बताएका छन् ।

‘यो सरकार टिकिहोस् भन्ने हाम्रो चाहना हुँदैन । तर, यो अप्राकृतिक भएका यो ढलि नै हाल्छ, हामीले बल नै गर्न पर्दैन । यसको आयु धेरै छ जस्तो मलाई लागेको छैन’, उनले भने, ‘यसबारे मैले मिति तोक्न मिल्दैन । हामी गम्भीर रुपले घटनाक्रम नियालिरहेका छौँ । अहिले जसरी सरकार चलिरहेको छ, यसले आफ्नो आयु आफैँ छोट्याउँदैछ भन्ने मलाई लाग्छ ।’

पत्रकार सम्मेलनमा दाहालले सत्तारुढ कांग्रेसभित्रै सरकारप्रति जबरजस्त रुपमा असन्तुष्टि चुलिएको प्रचण्डले दाबी गरे ।

कांग्रेसको संस्थापन समूहका नेताहरूको पनि असन्तुष्टि बाहिर आइसकेको बताउँदै उनले यस्तो अवस्थामा सरकार सहज ढंगले अगाडि जाने अवस्था नरहेको जिकिर गरे ।

दाहालले सम्बोधनका क्रममा माओवादी यो सरकार गिराएर तुरुन्तै नयाँ निर्माणतर्फ जाने कुरामा नरहेको बताए । ‘माओवादी अहिले जनताबीचमा गएर संगठन सुदृढ गर्ने अभियानमा छ’, उनले भने, ‘स्थानीय तहदेखि नै भेला र सम्मेलन भइरहेका छन् । हाम्रो अभियानलाई जनताले राम्रो मानेका छन् ।’

दाहालले प्रधानमन्त्री हुँदाभन्दा अहिले बढी सहज र रिल्याक्स महसुस गरिरहेको पनि जिकिर गरेका छन् ।