काठमाडौं- नेकपा एमालेबाट निष्कासित नेता डा. भीमबहादुर रावलले प्रधानमन्त्री केपी शर्मा ओलीमाथि अर्को आरोप लगाएका छन् ।

भूमि, वन र निकुञ्जसम्बन्धी अध्यादेश ल्याएर वन र निकुञ्जको जग्गा पनि व्यक्तिलाई दिन सकिने प्रपञ्च ओलीले गरिरहेको आरोप रावलले लगाएका छन् ।

सरकारले ल्याएको भूमिसम्बन्धी अध्यादेशलाई राष्ट्रपति रामचन्द्र पौडेलले रोकिदिएको सन्दर्भमा रावलले यस्तो टिप्पणी गरेका हुन् । उनले पञ्चायतकालमा समेत प्राकृतिक सम्पदाको संरक्षण गर्न बनाइएका निकुञ्जको जग्गा व्यक्तिलाई दिन तम्सिनु भूमाफियाको स्वार्थपूर्ति गर्ने खेल हो कि ? भनेर प्रश्न गरेका छन्।

गत पुस ११ गते एमालेबाट निकालिएपछि रावलले प्रधानमन्त्री ओलीबारे आक्रामक टिप्पणी गरिरहेका छन् । उता ओलीनिकट र एमालेका नेताहरूले रावललाई राजावादी बन्न लागेको भन्दै कटाक्ष गरिरहेका छन् ।