काठमाडौं– पूर्वराष्ट्रपति तथा नेकपा (एमाले) की पूर्व उपाध्यक्ष विद्यादेवी भण्डारीले पार्टीको ११औँ राष्ट्रिय महाधिवेशनका सहभागी प्रतिनिधिहरूलाई देशको परिवर्तित अवस्था बुझेर नेतृत्व चयन गर्न सुझाव दिएकी छिन् ।

उनले प्रतिनिधिहरूलाई काठमाडौंको जाडोमा न्यानो स्वागत गर्दै महाधिवेशनको सफलताको शुभकामना समेत दिएकी छिन् ।

भण्डारीले जारी गरेको शुभकामना सन्देशमा भनिएको छ, ‘नेपाल कम्युनिष्ट पार्टी (एमाले)को ११औँ राष्ट्रिय महाधिवेशनमा सहभागी हुन देशका विभिन्न स्थानबाट काठमाडौं आएका सम्पूर्ण प्रतिनिधिहरूलाई काठमाडौंको जाडोमा न्यानो स्वागत गर्दछु । तपाईँ महाधिवेशन प्रतिनिधिहरू राजनीतिक रूपमा परिपक्व र आ–आफ्ना क्षेत्रका जिम्मेवार नेतासमेत हुनुभएकाले पार्टीको आन्तरिक जीवन, मुलुकको परिवर्तित परिवेश तथा विश्व परिस्थितिबारे अवगत नै हुनुहुन्छ ।’ उनले एमालेले लोकतान्त्रिक मूल्य मान्यतालाई जोगाउनु पर्ने बताएकी छिन्।

‘यस्तो परिवेशमा आयोजित पार्टीको सर्वोच्च निकायका रूपमा रहेको यो महाधिवेशन जबजका आधारभूत मान्यताहरूलाई आत्मसात गर्दै पार्टीभित्र लोकतान्त्रिक संवाद, स्वस्थ प्रतिस्पर्धा तथा सहकार्यको वातावरणलाई अझ सुदृढ बनाउँदै योग्य तथा सक्षम नेतृत्व निर्माण गर्न सक्षम हुनेछ भन्ने दृढ विश्वास लिएको छु’, उनले भनेकी छिन् ।

पूर्वराष्ट्रपति भण्डारीले मुलुक तरल राजनीतिक अवस्थाबाट गुज्रिरहेको सन्दर्भमा प्राप्त उपलब्धिहरूको रक्षा गर्दै थप उपलब्धि हासिल गर्न एकताबद्ध भएर अघि बढ्नु आवश्यक रहेको उल्लेख गरेकी छिन् ।

महाधिवेशनले मुलुक र जनताप्रति उत्तरदायी तथा दूरदृष्टिपूर्ण निर्णयहरू गर्न सफल होस् भनेकी छिन् ।

नेकपा (एमाले) को ११औँ राष्ट्रिय महाधिवेशन शनिबार भक्तपुरको सल्लाघारीमा उद्‌घाटन हुँदैछ । बन्दसत्र काठमाडौंको भृकुटीमण्डपमा सञ्चालन हुनेछ ।