काठमाडौं- भारतले ल्याटिन अमेरिकी मुलुक भेनेजुएलामा २.७ टन अत्यावश्यक खोप सहयोग प्रदान गरेको छ । भारतीय विदेश मन्त्रालयले ‘ग्लोबल साउथ’ मुलुकलाई सहयोग गर्ने प्रतिबद्धताअनुरुप भेनेजुएलालाई उक्त खोप प्रदान गरिएको जानकारी दिएको छ ।

सामाजिक सञ्जाल एक्समा पोस्ट गर्दै भारतीय विदेश मन्त्रालयका प्रवक्ता रणधीर जयसवालले ‘ग्लोबल साउथ’ मुलुकलाई सहयोग गर्ने प्रतिबद्धताअनुरुप भेनेजुएलाका जनतालाई उक्त सामग्री प्रदान गरिएको जानकारी दिएका हुन् । यस सहयोगले भेनेजुएलाको जनवास्थ्य प्रणालीलाई थप सुदृढ गरी हजारौँ जनतालाई लाभ मिल्ने अपेक्षा गरिएको छ ।

भारतीय समाचार संस्था एएनआईले दुई मुलुकबीच ६ दशकदेखि सुमधुर र न्यानो सम्बन्ध रहेको जनाएको छ । सन् २०२३ मा दुबै मुलुकले द्विपक्षीय सम्बन्ध स्थापनाको ६४ औँ वार्षिकोत्सव मनाएका थिए ।

विगत चार दशकदेखि काराकास र नयाँ दिल्लीमा रहेका दूतावासले कूटनीतिक गतिविधि सञ्चालन गर्दै आएको पनि एएनआईले उल्लेख गरेको छ ।

भेनेजुएला भारतका लागि तेल आपूर्ति गर्ने महत्वपूर्ण साझेदार मुलुक हो भने भारतले भेनेजुएलातर्फ औषधि, मेसिनरी, विद्युतीय उपकरण र टेक्सटाइल आपूर्ति गर्दै आएको छ ।