काठमाडौं- नेपाली कांग्रेसका सह-महामन्त्री फर्मुल्लाह मन्सुरको अभिव्यक्तिले बिहीबार सानेपामा जारी केन्द्रीय कार्यसमिति बैठकमा हो-हल्ला मच्चिएको छ।

बिहीबारको बैठकमा आफ्नो धारणा राख्दै मन्सुरले आगामी फागुन २१ गते हुने आमनिर्वाचनअघि नियमित महाधिवेशन सम्पन्न गर्नुपर्ने बताए। उनले भने, ‘अहिले पनि बोकेको व्यक्तिले कांग्रेस हाँक्न सक्दैन, अहिलेको संकटबाट निकास पनि दिन सक्दैन।’

उनले कांग्रेसको भ्रातृसंस्था बनाउँदा पनि नेतृत्व बोकेर बनाइएकाले त्यसले काम गर्न नसकेको उदाहरण दिए। ‘मैले त्यसरी नबनाऊँ भनेको थिएँ। बोकेको बाघले मृग मार्न सक्दैन भनेको थिएँ। बोकेको व्यक्तिले काम गर्न सक्दैन,’ उनले थपे ।

उनको यस भनाइपछि हलमा केही नेताले असहमति जनाउँदै ‘शब्द सम्हालेर बोल्नुस्’ भन्ने दबाब दिए ।

मन्सुरले भने, ‘स्पाथना कालदेखि कांग्रेसले मुलुकको नेतृत्व गर्दै आएको हो। आज पनि राजनीतिक निकास कांग्रेसले नै दिन सक्छ, तर बोकेको नेतृत्वले होइन। त्यसैले निर्वाचनअघि नेतृत्वको छिनोफानो हुनुपर्छ।’

उनले पार्टीभित्रको नेतृत्वको असमर्थता र संगठनात्मक कमजोरीतर्फ संकेत गर्दै निष्कर्षमा भने, ‘अहिले हामीले अग्रगमनको एजेन्डा समात्नुपर्छ, त्यसका लागि पहिले महाधिवेशन गरेर नेतृत्वलाई नयाँ ऊर्जा दिनु जरुरी छ।’