बेल्जियम– बेल्जियमको एन्त्रोपमा दसैँ, तिहार,नेपाल सम्वत, छठ र ल्होसार पर्वको अवसरमा शुभकामना आदानप्रदान कार्यक्रम आयोजना गरिएको छ । नेपाली मिलन केन्द्र, एन्त्रोप बेल्जियमको आयोजनामा आइतबार शुभकामना कार्यक्रम आयोजना गरिएको हो । 

विश्व शान्तिको कामनासहित कार्यक्रम आयोजना गरिएको केन्द्रकी महासचिव कविता सिंखडा दाहालले जानकारी दिइन् । यस्तै नेपाली व्यवसायी संघ बेल्जियमका उपाध्यक्ष रमेश दाहाल र कासी दनै तथा संस्थाको विकासमा सहयोग गर्दै आएका गणेश अधिकारी, दामु अधिकारी, ललितकुमार पोखरेल, चित्र सुवेदी, गणेश गैह्रे, युद्धबहादुर थापालगायतलाई सम्मान गरिएको थियो । 

कार्यक्रममा संस्थाका निवर्तमान अध्यक्ष सुशीला खतिवडा, पूर्वअध्यक्ष दीपक न्यौपानेसहित उपस्थित थिए । संस्थाका सल्लाहकार चित्र सुवेदीले कार्यक्रम व्यवस्थापनको जिम्मेवारी लिएका थिए । 

कार्यक्रममा जेन-जी आन्दोलन र हालै नेपालमा गएको बाढीपिहरोमा परी ज्यान गुमाएकाहरूको चीर शान्तिको कामना गर्दै शोकसन्तप्त परिवारमा धैर्यधारण गर्ने शक्ति मिलोस् भन्ने सामूहिक कामना गरिएको थियो । 

अध्यक्ष कान्ति अधिकारी,पूर्वअध्यक्ष न्यौपाने, निवर्तमान अध्यक्ष खतिवडा र सल्लाहकार सुवेदीले पानसमा बत्ती बालेर कार्यक्रम शुभारम्भ गरेका थिए । 

एन्त्रोपमा सामाजिक क्रियाकलापमा सक्रिय उक्त संस्थाले नेपालीहरुबीच भाइचारा सम्बन्ध विकास, संस्कृति प्रवर्द्धनका साथै नेपालमा दैवीप्रकोप उद्धार,ज्येष्ठ नागरिक, घरबारविहीन तथा क्यान्सरपीडित नेपालीहरूलाई आर्थिक सहायता प्रदान गर्दै आएको छ ।