काठमाडौं– नयाँ सरकार गठन भएसँगै गत मंगलबारदेखि ठप्प रहेको काभ्रेमा जनजीवन शनिबारदेखि पुनः सामान्य बन्दै गएको छ । 

शुक्रबार केही गाडी सीमित रूपमा चले पनि शनिबार बिहानैदेखि निजी तथा सार्वजनिक यातायात बाक्लो सङ्ख्यामा सञ्चालनमा आएका छन् ।

सुरक्षाको कारण सेनाले कफ्र्युसमेत लगाएको थियो। शनिबार बिहान कफ्‌र्यु हटाइएसँगै जनजीवन सहज बन्दै गएको हो । सबै जनता आफ्नो पेसा व्यवसायमा संलग्न भएका छन्। पसलहरू क्रमशः खुल्न थालेका छन् भने प्रदर्शनका क्रममा क्षति पुगेका कार्यालयहरू सरसफाइको काम सुरु गरिएको छ ।

सुरक्षाको लागि तैनाथ गरिएको नेपाली सेना शनिबार बिहानदेखि सडकबाट फिर्ता भइसकेको छ । अहिले नेपाल प्रहरीले सुरक्षा दिइरहेको छन् ।

आन्दोलनका क्रममा बनेपा, धुलिखेल, पनौती, पाँचखाललगायतका क्षेत्रमा सरकारी निकायदेखि स्थानीय जनप्रतिनिधिहरूको निजी आवाससम्ममा तोडफोड, आगजनी र लुटपाट भएको थियो ।