काठमाडौँ – नवनियुक्त प्रधानमन्त्री सुशीला कार्कीको सपथ ग्रहण समारोहमा सहभागी भएपछि राष्ट्रिय स्वतन्त्र पार्टी (रास्वपा) नेतृ सुमना श्रेष्ठबारे अनेक अफवाह फैलिएको छ ।

सामाजिक सञ्जालमा सुमना रास्वपा छाडेर नवगठित मन्त्रिपरिषद् सदस्य हुन लागेको अनुमान गर्नेहरू छ्यापछ्याप्ती छन्‌ ।

तर, आफू मन्त्री बन्न लागेको समाचार झुटो भएको सुमनाले बताएकी छन् । फेसबुक लाइभमा उनले शनिबार भनेकी छन्, ‘भ्रममा कोही पनि नपरिदिनुहोला, म क्याबिनेटमा जान लागेको छैन ।’

सुमनाले जेन–जी पुस्ताको आन्दोलनलाई सफल बनाउने सबैले सहयोग गर्नुपर्नेमा पनि जोड दिएकी छन् । आफूजस्तै अवसर पाएर काम गरिरहेका व्यक्तिहरू अब ‘ब्याक सिट’मा बसेर सरकारलाई सहयोग गर्नुपर्ने उनको भनाइ छ ।

‘साथीहरू मैले के भन्न चाँहे भने हाम्रा यति कलिला भाइबहिनीहरूको दाहसंस्कार सकिएको छैन, उहाँहरूको बलिदानबाट आएको यो परिवर्तनमा मजस्तो अवसर पाएर काम पाएको मान्छेहरू मन्त्री बन्ने सपना नराखौँ भन्न चाहन्छु,’ सुमनाले भनेकी छन् ।