काठमाडौं– सुनचाँदीको अवैध कारोबारमा संलग्न रहेको आरोपमा पोखराबाट पक्राउ परेका ११ जना भारतीय नागरिकको सम्बन्धमा नेपाल सुनचाँदी रत्न तथा आभूषण महासंघको ध्यानाकर्षण भएको छ ।

महासंघको टोली गृहमन्त्री रमेश लेखक समक्ष कालीगढ पक्राउ परेको  भन्दै पुगेको छ । साउन २३ गते शुक्रबार कास्की प्रहरीले ११ जना भारतीय कालीगढहरूलाई नियन्त्रणमा लिएको थियो ।

महासंघको जानकारीअनुसार उनीहरूमध्ये अधिकांशले नेपाल सरकारको सम्बन्धित निकायमा दर्ता भई व्यवसाय गर्दै आएको र केवल ज्याला मजदुरीको काम मात्र गरेको भन्दै गृहमन्त्रीलाई ध्यानाकर्षण गराएको छ । 

महासंघले सत्यतथ्य नबुझी हचुवाको भरमा व्यवसायी र मजदुरलाई दुःख दिने काम रोक्न माग गरेको बताएको छ । महासंघले निष्पक्ष छानबिनमा सहयोग गर्ने प्रतिबद्धता पनि व्यक्त गरेको छ । 

यस सम्बन्धमा महासंघले गण्डकी प्रदेश प्रहरी कार्यालयका प्रहरी नायव महानिरीक्षकलाई पनि बोधार्थ महासंघले पठाएको छ ।