काठमाडौं- शहीद गंगालाल राष्ट्रिय हृदय केन्द्र बाँसबारीमा २५ वर्षदेखि कार्यरत वरिष्ठ कन्सल्टेन्ट कार्डियाक सर्जन तथा कार्डियोभास्कुलर विभाग प्रमुख डा. रामेश कोइरालाले असोज ३० गतेदेखि लागू हुने गरी राजीनामा दिएका छन्।

हाल अमेरिकामा रहेका डा. कोइरालाले केन्द्रका कार्यकारी निर्देशकलाई पठाएको राजीनामा पत्रमा व्यक्तिगत कारणले जिम्मेवारी बहन गर्न नसक्ने उल्लेख गरेका छन्।

उनले विदेशमा रहेका कारण मिति १६ अक्टोबर २०२५ (असोज ३०) अघि नेपाल फर्कन नसक्ने भएकाले उक्त मितिबाट राजीनामा लागू हुने गरी स्वीकृत गर्न आग्रह गरेका छन्।

पत्रमा डा. कोइरालाले आफ्नो कार्यकक्षमा व्यक्तिगत सामानबाहेक कुनै जरुरी वा गोप्य कागजात नरहेको उल्लेख गर्दै हस्तान्तरणसम्म पर्खन अनुरोध गरेका छन्।

२५ वर्षको सेवाकाल सम्झँदै उनले केन्द्रको प्रगति र भावी योजनाप्रति विश्वास व्यक्त गरेका छन्।

‘संघीय सरकारले यस केन्द्रलाई ‘शहीद गंगालाल राष्ट्रिय हृदय तथा स्नायु केन्द्र’का रूपमा बिस्तार गर्ने सपना पुरा हुनेछ भन्नेमा म ढुक्क छु,’ पत्रमा उनले उल्लेख गरेका छन्।

डा. कोइरालाले आगामी दिनमा पनि केन्द्रका लागि सल्लाह–सुझावका हिसाबले उपलब्ध हुने प्रतिबद्धता जनाएका छन्।