काठमाडौं– बिमाको प्रथम सेवा विन्दुको बारेमा आवश्यक जानकारी गराउन सबै स्थानीय तहलाई स्वास्थ्य बिमा बोर्डले आग्रह गरेको छ । 

आइतबार एक सार्वजनिक सूचना जारी गर्दै बोर्डले सबै स्वास्थ्य बिमाको प्रथम विन्दु भएर स्वास्थ्य सेवा दिन चाहने स्थानीय तह अन्तर्गतका स्वास्थ्य संस्थाहरूले जानकारी गराउन आग्रह गरेको हो । साउन १ गतेदेखि सरकारी स्वास्थ्य संस्थाहरूबाट मात्र प्रथम सेवा विन्दु तोकेपछि बीमितहरूलाई समस्या हुने गुनासो आए पछि बोर्डले आज यस्तो सूचना प्रकाशन गरेको हो । 

स्वास्थ्य बीमा ऐन, २०७४ (प्रथम संशोधन, २०८२) को दफा ९ को उपदफा (६) बमोजिम प्रथम सेवा विन्दु प्रयोजनकालागि प्रत्येक स्थानीय तहमा कम्पनीमा एउटा सेवा प्रदायक स्वास्थ्य संस्था रहने व्यवस्था रहेको छ । 

‘सोही व्यवस्थाबमोजिम स्थानीय तहअन्तर्गतका कुन–कुन सेवा प्रदायक स्वास्थ्य संस्थाहरूमा स्वास्थ्य बिमाको प्रथम सेवा विन्दु आवश्यक पर्ने हो र प्रथम सेवा विन्दुमा लागि अपुग भएका मापदण्ड कति समयमा सम्पन्न गर्न सकिन्छ भन्ने विषयमा बीमा बोर्डलाई जानकारी गराउन हुन निर्णय अनुसार अनुरोध गरिन्छ’, सूचनामा उल्लेख गरिएको छ। 

बोर्डले साउन १ गते देखि सरकारी स्वास्थ्य संस्थाहरूलाई मात्र प्रथम सेवा विन्दु राख्ने निर्णय गरेको छ ।