काठमाडौं- प्रधानमन्त्री केपी शर्मा ओली आउने भएपछि झापाको दमकमा चलिरहेको राष्ट्रिय स्वतन्त्र पार्टीको हस्ताक्षर अभियानमा प्रहरीले हस्तक्षेप गरेको छ।

दमकस्थित चोकमा आयोजित हस्ताक्षर अभियान केही समयका लागि रोक्न भन्दै प्रहरीले हस्तक्षेप गरेको हो ।

इलाका प्रहरी कार्यालय दमकबाट प्रहरी निरीक्षकको कमान्डमा पुगेको टोलीले रास्वपा सभापति रवि लामिछानेमाथि राजनीतिक प्रतिशोध भएको भन्दै चलेको हस्ताक्षर अभियानमा अवरोध गरेको हो ।

प्रहरी निरीक्षकसहितको टोलीले हस्ताक्षर अभियानका नाममा माइकिङ नगर्न, भिड नदेखाउन र केही समयलाई यो अभियान रोक्न भनेको थियो ।

तर आयोजकहरूले नमानेपछि प्रहरीले हस्तक्षेप गरेर कार्यक्रम बिथोलिदिएको हो । ‘पाँचवटा प्रहरीको गाडी आएर माइक खोसेको छ । हाम्रो माइक भाँचिदिएको छ । हामीलाई यहाँ हट्न दबाब दिएको छ’, रास्वपाका एक कार्यकर्ताले भने, ‘प्रहरीले हाम्रो माइकसमेत भाँचिदिएको छ । प्रहरी हो कि गुन्डा हो, यस्तो व्यवहार हुँदै भएन ।’

प्रधानमन्त्री ओली यतिबेला इलाम र झापासहितको जिल्ला भ्रमणमा छन् । उनी गृहनगर दमक पुग्दै गर्दा रास्वपाको हस्ताक्षर कार्यक्रममा प्रहरीले हस्तक्षेप गरेर रोक्न दबाब दिएको हो ।