मुस्ताङ – संविधानसभा सदस्य एवं नेपाल कम्युनिष्ट पार्टी (माओवादी केन्द्र) का जिल्ला नेता वीरेन्द्र जुहारचनको आज बौद्ध परम्पराअनुसार मुस्ताङको मार्फास्थित राजखोला र कालीगण्डकी दोभानमा अन्त्येष्टि गरिएको छ । उनको ६९ वर्षको उमेरमा बिहीबार मार्फास्थित निजी निवासमा निधन भएको हो ।

जुहारचनको अन्त्येष्टिमा माओवादी केन्द्रका महासचिव देव गुरुङसहितका नेता मुस्ताङको मार्फा पुगेका छन् । उनको पार्थिव शरीरमा श्रद्धाञ्जली अर्पण गर्न र पार्टीको झण्डा ओढाएर सम्मान गर्न महासचिव गुरुङसहित नेताहरू यहाँ पुगेका हुन् ।

आज जुहारचनको पार्थिव शरीरमा महासचिव गुरुङ, मुस्ताङ जिल्ला इञ्चार्ज कपिल लामा, जिल्ला समन्वय समिति संयोजक धीरेन्द्र विक, प्रदेश कमिटी सदस्य ङुटुक गुरुङलगायत नेताले पार्टीको झण्डा ओढाएर श्रद्धाञ्जली व्यक्त गरे । अन्त्येष्टिमा माओवादी केन्द्रका जिल्ला, प्रदेश र केन्द्रीय नेताहरूको उपस्थिति थियो ।

स्वर्गीय जुहारचनलाई श्रद्धाञ्जली अर्पण गर्दै महासचिव गुरुङले उनको निधनले पार्टी र कम्युनिष्ट आन्दोलनप्रति अतुलनिय क्षति पुगेको बताए । यस दुःखद् घडीमा शोकलाई शक्तिमा रुपान्तरण गरी अघि बढ्नुपर्ने भन्दै गुरुङले परिवारजनमा समवेदना अर्पण गरे।

संविधानसभा सदस्य जुहारचनको निधनप्रति नेकपा (माओवादी केन्द्र)ले शोक वक्तव्य प्रकाशित गरी श्रद्धाञ्जली अर्पण गरेको छ । उहाँले तत्कालीन पुष्पलाल समूहबाट विसं २०३० देखि राजनीतिक यात्रा सुरु गरेका थिए । त्यसपछि माओवादी केन्द्रमा आवद्ध उनी विसं २०६४ मा केन्द्रको समानुपातिक क्लस्टरबाट सांसद भई संविधानसभा सदस्य भएका थिए ।