काठमाडौं– इरानी राजगद्दीका उत्तराधिकारी रेजा पह्लावीले जनतालाई इस्लामिक गणतन्त्रलाई उखेलेर फाल्न आह्वान गरेका छन् । सामाजिक सञ्जाल एक्समा फारसी भाषामा पोस्ट गर्दै पूर्वराजा मोहम्मद रेजा पह्लावीका छोरा एवम् पह्लावी वंशका उत्तराधिकारी रेजा पह्लावीले यस्तो आह्वान गरेका हुन् ।

शुक्रबार एक्समा पोस्ट गर्दै उनले इजरायल र अमेरिकाविरुद्ध हुनसक्ने युद्ध इरान वा इरानी जनताको युद्ध नभइ ‘खामेनी र इस्लामिक गणतन्त्रको युद्ध’ हुने बताएका छन् । उनले इरानका सुरक्षाबललाई इस्लामिक गणतन्त्रको नभइ जनताको साथ दिन समेत आह्वान गरेका छन् ।

उनले इस्लामिक गणतन्त्रका सर्वोच्च नेता आयातोल्लाह अली खामेनेईले इरानी जनतामाथि जबरजस्ती युद्धको भारी बोकाउन खाजेको पनि आरोप लगाए । आयातोल्लाह खामेनीले भारी बोकाउन खोजेको युद्ध इरानी जनताको चाहनाविपरीत रहेको उल्लेख गरेका छन् ।

‘इरानीविरुद्धको इस्लामिक गणतन्त्र सत्ताका बेपरवाह नेता अली खामेनेईले फेरि एक पटक हाम्रो देशलाई युद्धमा होमेका छन्’, पह्लावीले लेखेका छन्, ‘यो इरानको युद्ध होइन, इरानी जनताको युद्ध पनि होइन । यो खामेनेईको युद्ध हो र इस्लामिक गणतन्त्रको युद्ध हो ।’

इजरायलले इरानका पूर्वाधार र सैन्य संरचना एवम् अधिकारीलाई लक्षित गरी आक्रमण गरेसँगै मध्यपूर्वमा सैन्य तनाव बढिरहेका बेला पह्लावीको यस्तो भनाइ आएको हो । पह्लावीले इरानी सुरक्षा बललाई जनताको पक्षमा उभिन समेत अपिल गरेका छन् ।

‘यो सत्ता र यसका भ्रष्ट, अयोग्य नेताहरुले तपाईँको जीवन वा हाम्रो इरानको भविष्यलाई मतलब गर्दैनन् ।’ उनले भनेका छन् । पछिल्लो घटनाक्रमलाई उनले ‘इरानी राष्ट्र र विध्वंशकारी इस्लामिक गणतन्त्रबीचको लडाइँ’ को संज्ञा दिएका छन् । उनले जनतालाई आन्दोलन र हड्तालमा उत्रिन समेत आह्वान गरेका छन् ।

‘यस्तो कठिन घडिमा म तपाईँहरुसँगै उभिएको छु ।’ उनले लेखेका छन्, ‘यो युद्धमा हमी एकैठाउँमा छौँ र हामी विजयी हुनेछौँ ।’

सन् १९७९ मा इरानमा आयातोल्लाह रोहल्ला खोमेनीको नेतृत्वमा भएको इस्लामिक क्रान्तिपछि उनी अमेरिकामा निर्वासित जीवन बिताइरहेका छन् । इस्लामिक क्रान्तिपछि इरानमा राजतन्त्रको अन्त्य भइ इस्लामिक गणतन्त्रको स्थापना भएको थियो ।

रेजा पह्लावी उक्त क्रान्तिले अपदस्थ गरेका राजा मोहम्मद रेजा पह्लावीका जेठा छोरा हुन् । उनी इरानी गद्दीका उत्तराधिकारी पनि हुन् ।

आफू इरानी गद्दीको उत्तराधिकारी भएपनि उनी इरानमा राजतन्त्र पुनस्र्थापनाको पक्षमा नरहेको बताइन्छ । उनले इरानमा स्वतन्त्र एवम् लोकतान्त्रिक भविष्यको वकालत गर्दै आएका छन् ।

هم‌میهنان،

علی خامنه‌ای، رهبر نابخرد رژیم ضدایرانی‌ جمهوری اسلامی بار دیگر ایران ما را درگیر جنگ کرده‌ است؛ جنگی که جنگ ایران و ملت ایران نیست، جنگ جمهوری اسلامی و خامنه‌ای است.

پیام من به نیروهای نظامی، انتظامی و امنیتی روشن است: این رژیم و سرکردگان فاسد و نالایقش نه برای جان…

— Reza Pahlavi (@PahlaviReza) June 13, 2025