काठमाडौं – निर्देशक शोभित बस्नेतले फिल्म ‘पीआर’को छायाङ्कन सकेका छन् । २८ दिनको तालिकामा उनले छायाङ्कन पूरा गरेका हुन् ।

निर्माण पक्षका अनुसार यो फिल्मको छायाङ्कन दुई चरणमा गरिएको थियो । पहिलो चरणको छायाङ्कन अस्ट्रेलियामा भएको हो । गत माघ अन्तिममा यस फिल्मको छायाङ्कन सुरु भएको थियो ।

निर्देशक बस्नेतका अनुसार अस्ट्रेलियामा यस फिल्मको ६० प्रतिशत अंश छायाङ्न गरिएको छ । उनले उता १८ दिन छायाङ्कन गरेका थिए ।

दोस्रो चरणको छायाङ्कन अघिल्लो साता पोखराबाट सुरु भएको थियो ।

निर्देशक बस्नेतका अनुसार कथाको मागअनुसार यो फिल्मको छायाङ्कन नेपाल र विदेशमा गरिएको हो ।

छायाङ्कन सकिएपछि निर्देशक शोभितले फिल्म दर्शकले मन पराउनेमा ढुक्क रहेको दाबी गर्छन् । भन्छन्, ‘कलाकारहरुले राम्रो काम गर्नुभएको छ । फिल्म राम्रो बनेको छ । दर्शकले मन पराउनेमा ढुक्क छु ।’

उनका अनुसार यो फिल्म विदेशमा रहेका नेपालीहरुले पीआरको लागि गरेको संघर्ष र अभिभावकहरुले सन्तानप्रति राख्ने आशाको कथामा  आधारित छ ।

यस फिल्ममा नीर शाह, गौरी मल्ल, रबिन्द्र खड्का, उत्तम केसी, आर ए सुरज पौडेल, राजन कुँवर, विनिता कार्की, पूजा चौधरीलगायतका कलाकारहरुको अभिनय रहेको छ।

यस फिल्ममा कथा शोभितकै हो भने पटकथा र संवाद रहेको गणेश बुढाथोकीको छ। सलोन सलिना फिल्मसको ब्यानरमा बनेको यो फिल्मका निर्माताहरु प्रदीप दाहाल, लक्ष्मण सापकोटा र रञ्जित शाह हुन् ।

निर्माण पक्षले यस फिल्मको प्रदर्शन मिति भने अहिलेसम्म टुंगो लगाएको छैन ।