काठमाडौं– काठमाडौं उपत्यकासहित देशभरका सात वटा सहर आज अस्वस्थकर बनेका छन् । 

वायु प्रदूषणको तह बढेसँगै काठमाडौंको शंखपार्क, रत्नपार्क, ललितपुरको भैसैपार्टी, भक्तपुरको सल्लाघारी, धनकुटा र चितवनको भरतपुर अस्वस्थकरको सूचीमा परेका हुन् । 

वातावरण विभागका अनुसार आज बिहान खुमलटार सर्वाधिक प्रदूषित बनेको छ । बिहान ११ बजे खुमलटारको वायुको गुणस्तर मापदण्ड (एक्यूआई) १७२ रहेको वातावरण विभागको तथ्यांक छ ।

सोही समयमा शंखपार्कको एक्यूआई १७० र रत्नपार्कको १६३ पुगेको छ । ललितपुरको भैँसेपाटी र भक्तपुर सल्लाघारीको एक्यूआई क्रमशः १६६ र १६४ छ । उपत्यकाबाहिर धनकुटाको १५२ र चितवनको भरतपुरको एक्यूआई १५१ पुगेको छ । यीबाहेक अरू सहरमा एक्यूआई १५० भन्दा कम छ । 

विश्व स्वास्थ्य संगठन (डब्ल्यूएचओ) को मापदण्डअनुसार एक्यूआई १०१ देखि १५० को वायु बालबालिका, वृद्धवृद्धा र दीर्घ रोगीका निम्ति अस्वस्थकर हुन्छ । त्यो १५१ देखि २०० सम्म पुगेमा सबैका निम्ति अस्वस्थकर हुन्छ भने २०१ देखि ३०० सम्म पुगेमा अति अस्वस्थकर र त्योभन्दा माथि भएमा खतरनाक हुन्छ ।