काठमाडौं – गायक रामकृष्ण ढकालले फिल्म ‘मालती मङ्गले’ निर्माणको घोषणा गरेका छन् । उनले बुधबार सामाजिक सञ्जालमार्फत फिल्म निर्माणबारे जानकारी दिएका हुन् ।

गायनमार्फत ख्याति कमाएका ढकाल फिल्मका लागि अपरिचित व्यक्ति होइनन् । उनको अभिनय रहेको फिल्म आशीर्वाद २०५८ सालमा प्रदर्शनमा आएको थियो ।

निर्माण घोषणा गर्दै ढकालले आफ्नो पहिलो फिल्मलाई स्मरण गरेका छन् । उनले भनेका छन्, ‘त्यो चलचित्र मेरो जीवनको अविस्मरणीय क्षणहरूमध्ये एक रह्यो । समय कति छिटो बित्दो रहेछ, आज त्यस क्षणलाई सम्झँदा २३ वर्ष बितिसकेको रहेछ !’

उनले यस फिल्ममा आफू निर्माताको भूमिकामा मात्रै रहने बताएका छन् ।

ढकालले आफ्नो संगीतिक यात्राको कथालाई फिल्ममा उतार्न लागेको संकेत गरेका छन् । उनले लेखेका छन्, ‘सङ्गीत मेरा निम्ति जीवन हो, र अहिले त्यो यात्रालाई चलचित्रमार्फत नयाँ रूप दिन लागिरहेको छु ।’

ढकालको बाल्यकाल सबैको चासोको विषय छ । उनले आफ्नो बाल्यकालबारे खुलेर कुरा गरेका छैनन् ।

फिल्मका कलाकार चयनको काम भने बाँकी रहेको बुझिएको छ । निकट भविष्यमा यसबारे जानकारी दिने उनले उल्लेख गरेका छन् ।

यो फिल्म रानी म्युजिक इन्टरनेशनल प्रा.लि. ब्यानरमा निर्माण हुनेछ । चलचित्रको निर्देशन प्रकु पाण्डे (प्रकाश) ले गर्नेछन् भने कार्यकारी निर्माताको रूपमा सागर ज्ञवाली रहनेछन् ।

ढकालले आफ्नो बाल्यकालदेखि संगीतमा सक्रिय छन् । उनले चार हजारभन्दा बढी गीतमा स्वर दिएका छन् ।