काठमाडौं- भ्रष्टाचारविरोधी अभियान सञ्चालन गर्ने अन्तर्राष्ट्रिय गैरसरकारी संस्था ट्रन्सपरेन्सी इन्टरनेशनलले पाकिस्तानको प्रहरी सबैभन्दा धेरै भ्रष्ट संस्था रहेको जनाएको छ । ट्रान्सपरेन्सी इन्टरनेशनल पाकिस्तानले जारी गरेको प्रतिवेदनमा पाकिस्तानी जनताले त्यहाँको प्रहरी सबैभन्दा भ्रष्ट सरकारी संस्था रहेको महसुस गर्ने जनाइएको छ ।

उक्त संस्थाले ४ हजार पाकिस्तानी जनतामाझ गरेको सर्वेक्षणमा यस्तो तथ्य सार्वजनिक भएको हो । हरेक प्रान्तका एक हजार जना समेटेर ४ हजार जनालाई सर्वेक्षणमा सहभागी गराइएको थियो ।

तीमध्ये २४ प्रतिशतले प्रहरी नै सबैभन्दा भ्रष्ट संस्था रहेको प्रतिक्रिया दिएका थिए । सबैभन्दा धेरै पञ्जाब प्रान्तका ३४ प्रतिशतले भ्रष्टाचार हुने गरेको जनाएका थिए । त्यसैगरी, बलोचिस्तानका २२ प्रतिशत, सिन्धका २१ प्रतिशत र खैबर पख्तुनख्वा प्रान्तका २० प्रतिशतले प्रहरी नै सबैभन्दा धेरै भ्रष्ट रहेको उल्लेख गरेका थिए ।

सन् २०२३ को तुलनामा भने प्रहरी भ्रष्ट रहेको भन्ने जनताको अनुभूतिमा केही सुधार भएको जनाइएको छ । प्रहरीपछि पाकिस्तानमा ठेक्कपट्टा क्षेत्र र त्यसपछि न्यायालय सबैभन्दा भ्रष्ट रहेको सर्वेक्षणका सहभागीहरुले उल्लेख गरेका थिए ।