काठमाडौं – शनिबारदेखि सुरु हुन लागेको नेकपा एमालेको ११ औं महाधिवेशनमा अध्यक्षमा लड्ने घोषणा गरेका बरिष्ठ उपाध्यक्षईश्वर पोखरेलले प्यानल नै खडा गर्ने भएका छन् । शुक्रबार साँझ उनले प्यानल निर्माणबारे आफ्नो पक्षसँग छुट्टै छलफल गरेका हुन् ।

‘हामी सहमति गरेर जाने पक्षमा छैनौं । आफ्नो तर्फबाट प्यानल घोषणा हुन्छ। तर यसबारे अहिले छलफल भइरहेको छ’, एक नेताले भने, ‘ईश्वर कमरेडको नाममा सहमति हुन्छ भने हामी सहमत गर्न तयार छौँ।’

यस्तै पोखरेल समुहबीच मनोनित गर्न लागेका महाधिवेशन प्रतिनिधिहरूको विषयमा पनि छलफल भइरहेको छ। एमाले केन्द्रीय कमिटी बैठकमा ओलीले एकलौटी रुपमा १०८ जना मनोनित सदस्यहरू राख्न खोजेपछि पोखरेल समूहले त्यसमा असन्तुष्टि जनाएको थियो।

त्यसपछि पोखरेलसम्मले छुट्टै लिस्ट बुझाएपछि ओली र पोखरेल दुईजना मिलेर यसको टुङ्गो लगाउने भन्दै बैठक सकिएको थियो। मनोनित प्रतिनिधिको विषयमा लामो समयसम्म छलफल भएको एमाले सचिवालयका नेताहरूको भनाइ छ।