काठमाडौं- शनिबारदेखि सुरू हुने एघारौँ महाधिवेशन अगाडि नेकपा एमाले सचिवालयको अन्तिम बैठक केन्द्रीय कार्यालय च्यासलमा सुरू भएको छ ।

यो बैठकमा अध्यक्ष केपी शर्मा ओलीले पदाधिकारी र केन्द्रीय कमिटी बढाउने प्रस्ताव लैजाँदैछन् ।

२०७८ साल मंसिर १० गतेदेखि १३ गतेसम्म चितवनमा भएको दशौँ महाधिवेशनबाट निर्वाचित पदाधिकारीको अन्तिम बैठकमा ओलीले केही महत्त्वपूर्ण प्रस्ताव राख्ने सम्भावना छ।

हाल कायम १५ सदस्यीय पदाधिकारीलाई बढाएर दशौँकै जत्रो १९ सदस्यीय बनाउने तयारी ओलीले गरेका छन्।

आफूतिर खुलेका नेताहरूलाई व्यवस्थापन गर्न मुश्किल परेपछि ओलीको यो रणनीति आएको हो। त्यस्तै २५१ सदस्यीय केन्द्रीय कमिटीलाई ३ सय सदस्यीय बनाउने योजना उनले ल्याएका छन् ।

तर ओलीको यो प्रस्तावविरुद्ध वरिष्ठ उपाध्यक्ष ईश्वर पोखरेलले काउन्टर प्रस्ताव पेश गर्ने सम्भावना छ । यदि अध्यक्ष ओलीले विधान संशोधन प्रस्ताव ल्याए त्यसको प्रतिवाद गरिने उपाध्यक्ष अष्टलक्ष्मी शाक्यले बताएकी छन् ।

तस्बिरहरू : दिनेश भण्डारी