काठमाडौं- नेकपा एमालेकी उपाध्यक्ष अष्टलक्ष्मी शाक्यले अध्यक्ष केपी शर्मा ओलीबाट भइरहेको आफूअनुकूल विधान संशोधन प्रयास पार्टीको हितविपरीत हुने बताएकी छिन्।

उनले शुक्रबार सचिवालय बैठकमा पदाधिकारी स्थायी कमिटी सदस्य र केन्द्रीय कमिटी सदस्यको संख्या थप्न विधान संशोधन संशोधन प्रस्ताव आउन लागेको सन्दर्भमा यस्तो बताएकी हुन् ।

शाक्यले आफूअनुकूल विधान परिवर्तन गरेर पार्टीलाई घाटा लगाउने काम नेताहरूले गर्न नहुने बताउँदै यसको प्रतिवादमा उत्रिने बताएकी छन् ।

‘त्यत्रो दोस्रो विधान महाधिवेशन गरेर बनाइएको विधानलाई केही महिनामै आफू कमजोर भएपछि अनुकूल बनाउन परिवर्तन गर्छु भन्न पाइँदैन । यदि यस्तो प्रस्ताव आजको सचिवालय बैठकमा गए हामी त्यसको प्रतिवाद गर्छौँ’, शाक्यले खबरहबलाई भनिन्, ‘भोलि महाधिवेशन हुँदैछ, आज विधान संशोधन रहने प्रस्ताव आउनु कतिको जायज छ, यहाँहरुले पनि मूल्याङ्कन गर्ने कुरा हो। पक्कै पनि अध्यक्ष यो बाटोमा जानुहुन्छ भन्ने मलाई लागेको छैन।’

एमालेमा अध्यक्ष ओली पक्षले केन्द्रीय कमिटी, स्थायी कमिटी र पदाधिकारीको सङ्ख्या थप्नका लागि विधान परिवर्तन गर्न लागेको हो ।