काठमाडौं– नेपाल कम्युनिस्ट पार्टीमा प्रवेश गर्दै डा. भीम रावलले एमालेमा रहेका नेताहरूलाई नेपाल कम्युनिष्ट पार्टीमा आउन आग्रह गरेका छन्।  नेपाल कम्युनिस्ट पार्टीमा प्रवेश गर्दै रावलले ओलीको सत्ता लिप्सा प्रवृत्ति र पार्टी नेतृत्वमा हस्तक्षेप गर्ने प्रवृत्ति नसकिने भन्दै आफ्नो टिममा आउन आग्रह गरेका हुन् ।

‘केपी ओलीको दमन सहेर नबस्नु साथीहरू नेपाल कम्युनिष्ट पार्टीमा आउनुहोस् । हाम्रो यात्रा र उद्देश्यलाई कसैले छेक्न सक्ने छैन । नेपाल कम्युनिस्ट पार्टीबाट यात्रा अगाडि बढाउन म आग्रह गर्दछु।’ उनले भने, ‘एमालेमा रहेको मैपनि तन्त्र स्वेच्छाचारी व्यक्तिलाई साथ दिएर नबस्नुहोस् नेपाली जनताको आवश्यकता र नेपाल राष्ट्रको स्वाधीनताका लागि पनि यसमा आउनुहोस्।’

उनले सम्पूर्ण वाम शक्तिहरू एकताबद्ध भएर अगाडि बढ्नुपर्ने कुरामा जोड दिए।

आफू नेपाल कम्युनिस्ट पार्टीमा समाहित हुँदा निकै उत्साहित र खुसी लागेको बताउँदै रावलले यस पार्टीबाट आफ्नो लामो यात्रा अगाडि बढाउने स्पष्ट पारे ।