काठमाडौं- नेकपा एमालेका केन्द्रीय सदस्य प्रकाशबहादुर शाह पनि नेपाली कम्युनिस्ट पार्टी (नेकपा) मा प्रवेश गरेका छन् । उनी एमालेका पूर्वउपाध्यक्ष डा. भीम रावलसँगै बुधबार राष्ट्रिय सभागृहमा भएको कार्यक्रमबाट नेकपामा प्रवेश गरेका हुन् ।

एमाले अध्यक्ष केपी शर्मा ओलीका पछिल्ला अभिव्यक्ति र क्रियाकलाप देशलाई थप संकटतर्फ धकेल्ने रहेको निष्कर्षसहित उनी नेकपामा प्रवेश गरे‍का हुन् ।

बुधबार भीम रावल नेतृत्वको मातृभूमि जागरण अभियान नेकपासँग समायोजन हुँदा उनी पनि प्रवेश गरेका हुन् ।

एमाले अध्यक्ष ओलीले ‘एघारौं महाधिवेशनमा कुनै छलफल नै नहुने र आफ्नो निर्देशनात्मक मन्तव्यपछि महाधिवेशन समापन हुने’ भनि दिएको मन्तव्यले उनी ‘जबजको चीरहरण’ गर्ने मनसाय राखेर अघि बढेको शाहले बताएका छन् ।

उनी २०७४ सालमा भएको प्रदेशसभाको पहिलो कार्यकालमा बाजुराबाट निर्वाचित भएका थिए ।

उनी एमालेबाट सुदूरपश्चिम प्रदेशसभा सदस्य भएका थिए । त्यसबेला उनी एमाले संसदीय दलको नेता पनि भए । उनी प्रदेशसभाको पहिलो कार्यकालमा आन्तरिक मामिला तथा कानुन र आर्थिक मामिला मन्त्री भएका थिए ।

शाह एमालेमा लगातार दुई पटक केन्द्रीय समितिमा निर्वाचित भएका थिए । बाजुराको बूढीगंगा गाउँपालिका निवासी उनी एमालेनिकट अनेरास्ववियुको बाजुरा अध्यक्ष हुँदै एमाले जिल्ला कमिटी अध्यक्ष पनि बनेका छन्।