काठमाडौं- पछिल्लो समय अन्तरिम सरकारविरुद्ध आन्दोलन घोषणा गरेका दुर्गा प्रसाईंको समूहले सरकारसमक्ष २७ बुँदे माग राखेको छ।

बुधबार गृहमन्त्रालयमा पुगेको प्रसाईंको समूहले गृहमन्त्री ओमप्रकाश अर्यालसमक्ष २७ बुँदे माग राखेको हो ।

प्रसाईं नेतृत्वको ‘राष्ट्र, राष्ट्रियता, धर्म संस्कृति तथा नागरिक बचाउ महाअभियान’का सदस्यहरूको माग पत्र बुझेपछि गृहमन्त्री अर्यालले चुनावमा जान सुझाएका हुन् ।

महाअभियानका संयोजक प्रसाईंलाई अर्यालले राजनीतिक दल दर्ता गरेर फागुन २१ गतेको प्रतिनिधिसभा निर्वाचनमा होमिन सुझाएका हुन् । यद्यपि बुधबार गृहमन्त्रीलाई भेट्न प्रसाईं भने सिंहदरबारमा पुगेका थिएनन्।

प्रसाईं नेतृत्वको महाअभियानले बुधबार गृह मन्त्रालयमा पुगेर राखेका विभिन्न २७ बुँदे मागबारे सुनेपछि अर्यालले यस्तो सुझाव दिएका हुन् ।

प्रसाईंका मागबारे प्रतिक्रिया दिँदै गृहमन्त्री अर्यालले राजनीतिक प्रकृतिका रहेका बताए । उनले राजनीतिक माग पूरा गराउन पार्टी दर्ता गरेरै निर्वाचनमा जान सुझाएका हुन् ।

गृह मन्त्रालयका प्रवक्ता आनन्द काफ्लेले राजनीतिक प्रकृतिका माग पूरा गर्न दल दर्ता गरेर निर्वाचनमा होमिन भनिएको बताएका छन् ।

त्यस क्रममा गृहमन्त्री अर्यालले शान्ति प्रक्रिया र सुशासनका सन्दर्भमा राखिएका माग पूरा गर्न सरकार सकारात्मक रहेको जवाफ दिएका छन् ।

प्रसाईंले राजसंस्था र हिन्दु राज्य पुनर्स्थापनाका लागि जनमत सङ्ग्रह गर्नुपर्ने, प्रदेश संरचना खारेज गरी ५ विकास क्षेत्र र १४ अञ्चल ल्याउनुपर्ने माग गरेका छन् ।

त्यसैगरी जेन-जीका केही समूहले उठाउँदै आएको प्रत्यक्ष निर्वाचित कार्यकारी प्रधानमन्त्रीको व्यवस्था गर्नुपर्नेलगायत माग पनि प्रसाईं नेतृत्वको महाअभियानले गरेको छ।