काठमाडौं- भदौ २३ र २४ गते देशका विभिन्न भागमा भएका प्रदर्शनका क्रममा भएको भौतिक र मानवीय क्षतिको विवरण संकलन गर्न गठन गरिएको जाँचबुझ आयोग, २०८२ ले सम्बन्धित पक्षहरूलाई क्षतिको विस्तृत विवरण पठाउन आग्रह गरेको छ।

यस प्रकरणमा गत असोज ९ गतेदेखि नै आयोगले अनुसन्धान गरिरहेको छ । आयोगका प्रवक्ता विज्ञानराज शर्माले क्षतिको विवरण र क्षतिको अनुमानित लागत बुझाउन आग्रह गरेका छन् । क्षति भएको सम्पत्तिको बिमा भएको वा नभएको पनि खुलाउन भनिएको छ ।

विज्ञप्तिमा जाँचबुझ आयोग ऐन, २०२६ को दफा ३ बमोजिम गठन भएको आयोगले असोज ९ गतेदेखि औपचारिक रूपमा काम सुरू गरेको भनिएको छ ।

आयोगले प्रदर्शनका क्रममा राजनीतिक दल, संघसंस्था, निजी वा सार्वजनिक सम्पत्तिमा भएको क्षतिको यथार्थ विवरण sept8and9incident.ic@gmail.com इमेलमार्फत पठाउन अनुरोध गरेको छ।

क्षतिको विवरण पठाउँदा संघसंस्था वा व्यक्तिको नाम, ठेगाना, क्षतिको प्रकार, अनुमानित लागत, बीमा भएको वा नभएको र अन्य कैफियत उल्लेख गर्नुपर्ने आयोगले जनाएको छ। साथै, घटनालाई प्रमाणित गर्न सक्ने श्रव्यदृश्य, तस्बिर वा कागजात पनि संलग्न गर्न आग्रह गरिएको छ।

आयोगले भदौ २३ र २४ का प्रदर्शनका क्रममा काठमाडौँसहित देशका विभिन्न स्थानमा भएको मानवीय क्षति र सम्पत्ति विनाशको यथार्थ तथ्य उजागर गर्न व्यापक प्रमाण संकलन अभियान सुरु गरेको जनाएको छ।