काठमाडौं– मेची राजमार्गको विकल्पमा इलाम–तिल्केनी–बञ्जवेदी–नामसालिङ–नयाँबजार हुँदै फिक्कल निस्कने सडकखण्ड प्रयोग गर्न सकिने जिल्ला प्रशासन कार्यालय इलामले जनाएको छ । 

प्रशासनले आइतबार सूचना जारी गर्दै अस्थायी रूपमा उक्त खण्ड प्रयोग गर्न सकिने जनाएको हो । 

भू–संरचनागत जोखिमका कारण माइखोलास्थित राजदुवाली खण्ड भने तत्कालका लागि सुचारु गर्न सक्ने अवस्था नरहेको सूचनामा उल्लेख गरिएको छ । 

इलाम नगरपालिकाका स्थानीय निरज खडेगीका अनुसार दशैं मनाउन आएका यात्रुहरूसमेत अलपत्र परेका कारण हाललाई क्षतिग्रस्त पुल फिलिङ गरेर साना सवारी मात्रै सुचारु गर्न सकिएको हो । 

‘इलाम नगरपालिकाको ८ नम्बर वाडको तिल्लेनी हुँदै माइखोला बञ्जदेवीको आंशिक क्षतिग्रस्त ढलान पुलको पिल्लरमा फिलिङ गरेर अड्किएका साना सवारी सुचारु गर्ने हो, यो खण्डबाट सूर्योदय नगरपालिका फिदिम मेची राजमार्ग जोडिन्छ,’ उनले बताए ।

यो खण्ड पनि अस्थायी रूपमा खोलिएको हो भोलि पुनः मर्मत गर्ने छलफल भएको उनले थपे । जोखिम कायमै रहेकाले रातको समयमा सवारी सञ्चालन गर्न भने पूर्ण रूपमा रोक लगाइएको छ । 

असोज २६ गते राति १० बजेदेखि असोज २७ गते बिहान ६ बजेसम्म सवारी सञ्चालन बन्द रहने सूचनामा उल्लेख छ ।