काठमाडौँ- आईसीसी पुरुष टी–२० एसिया तथा इस्ट एसिया–प्यासिफिक छनोटको सुपर सिक्स चरणमा नेपाल अहिले संयुक्त अरब इमिरेट्स (यूएई) विरुद्ध ब्याटिङमा उत्रिएको छ ।

नेपालले टस जितेर पहिले ब्याटिङ गर्ने निर्णयसँगै यूएईलाई फिल्डिङको निम्तो दिएको हो ।

ओमान क्रिकेट एकेडेमीको मैदानमा कप्तान रोहित पौडेलले पहिले ब्याटिङमा जाने निर्णय लिएका हुन्।

प्रशिक्षक स्टुवार्ट लले जापानविरुद्धको खेलमा उतारेको सुरुवाती ११ लाई यूएईविरुद्ध पनि कायमै राखेका छन् ।

विश्वकप छनोटसँगै यो प्रतियोगिताको उपाधि यात्रा बलियो बनाउन यो खेल दुवै देशका लागि निर्णायक छ ।

नेपाल र यूएई समान दुई अंकसहित अपराजित छन् । यस खेलबाटै अपराजितमध्ये एउटा टिमले पहिलो हारको सामना गर्नुपर्नेछ ।

यदि नेपालले जितेमा विश्वकप छनोटको सम्भावना अझै बलियो बनाउनेछ । उता यो प्रतियोगिताको उपाधिनजिक पनि पुग्नेछ ।

यसअघिका खेलमा नेपाल यूएईविरुद्ध लगातार हार भोगेको छ । यसअघि नेपालले यूएईविरुद्ध ओमानमा भिडेका सबै तीन खेलमा निराश हुनु परेको थियो ।

नेपालले यूएईविरुद्ध यूएईमा भएको टी-२० एसिया कप छनोटको सेमिफाइनलमा हार भोगेको थियो। त्यहीकारण नेपालले एसिया कपको अवसर गुमायो ।

यस पटक नेपाल उच्च लयमा छ । डेढ वर्षपछि यूएईसँग पुरानै मैदानमा उत्रिएको नेपालले जित निकाल्ने योजना बनाएको छ ।
्