काठमाडौं- अख्तियार दुरुपयोग अनुसन्धान आयोगले रौतहटको माधवनारायण नगरपालिकाका तत्कालीन निमित्त प्रमुख प्रशासकीय अधिकृतसहित तीनजना र एक कम्पनीविरुद्ध भ्रष्टाचार मुद्दा चलाएको छ।

अख्तियारले निमित्त प्रशासकीय अधिकृत प्रलब कायस्थ, लेखापाल रामबलम प्रसाद यादवसहित तीनजना कर्मचारी र कम्पनीविरुद्ध विशेष अदालमा आइतबार भ्रष्टाचार मुद्दा दायर गरेको छ ।

विद्यालय भवन निर्माणको ठेक्कासम्बन्धी सूचना लुकाएर झुट्टा बिलभरपाईका आधारमा भुक्तानी दिएको आरोपमा तत्कालीन निमित्त प्रमुख प्रशासकीय अधिकृत कायस्थ, लेखापाल यादव, रौतहट एडभरटाइजिङ एजेन्सी प्रालि तथा उक्त कम्पनीका सञ्‍चालक अजित कुमार कर्णविरुद्ध अख्यिारले मुद्दा चलाएको हो ।

आर्थिक वर्ष २०७७/७८ मा माधवनारायण नगरपालिका–३, देवी माध्यमिक विद्यालय सखुअर्वामा भवन निर्माणका लागि आह्वान गरिएको बोलपत्र आह्वानको सूचना र बोलपत्र स्वीकृत गर्ने आशयको सूचना सार्वजनिक खरिद ऐनबमोजिम राष्ट्रियस्तरको दैनिक पत्रिकामा प्रकाशन नगरी भ्रष्टाचार गरेको अख्तियारले लगाएको छ ।

उनीहरूविरुद्ध अख्तियारले जनही दुई लाख ५७ हजार ९ सय ७० बिगो, बिगोबमोजिम जरिवाना सजाय गरी बिगो असुल र ऐनको दफा ८ को उपदफा (१) बमोजिम कैद माग दाबी गरेको छ ।