काठमाडौं – माओवादी केन्द्रका नेता जनार्दन शर्माले संसद् विघटन हुन लागेकाे भन्दै त्यसका लागि दलका प्रमुख नेताहरू नै जिम्मेवार रहेको टिप्पणी गरेका छन्।

शर्माले शुक्रबार सामाजिक सञ्जालमा लेख्दै संसद् विघटन सामान्य घटना नभई ऐतिहासिक त्रुटि भएको बताए। पार्टीलाई व्यक्तिगत स्वार्थ र पेवाको रूपमा मात्र हेर्ने नेताहरूका लागि यो ठूलो विषय नलागे पनि, इतिहासले यसको कठोर मूल्यांकन गर्ने उनले उल्लेख गरेका छन् ।

“संसद् विघटन हुनुमा दलका प्रमुख नेताहरू जिम्मेवार छन्,” उनले लेखेका छन्, “पार्टीलाई व्यक्तिगत पेवा सम्झनेहरूको लागि यो ठूलो विषय नहुन सक्छ, तर इतिहासले यसको मूल्यांकन गर्नेछ।”

शर्माले दलहरूको आन्तरिक स्वार्थ र नेताहरूको व्यक्तिगत अहंकारकै कारण मुलुक राजनीतिक अस्थिरतामा फसेको पनि संकेत गरेका छन्।

यसअघि संसद् विघटनसँगै देश फेरि राजनीतिक संक्रमणतर्फ धकेलिएको भन्दै विभिन्न दलका नेताहरूले आपत्ति जनाएका थिए।