काठमाडौँ – पूर्वप्रधानन्यायाधीश सुशीला कार्कीले अन्तरिम सरकार प्रमुखमा शपथ लिएपछि मन्त्रिपरिषद् बैठकबाट प्रतिनिधि सभा विघटन सिफारिस गर्ने सहमति भएको छ ।
राष्ट्रपति रामचन्द्र पौडेलले आजै बेलुकी पूर्वप्रधानन्यायाधीश सुशीला कार्कीलाई प्रधानमन्त्री नियुक्त गरी लगत्तै ९ बजे पद तथा गोपनीयताको सपथ खुवाउने उनको सचिवालयका अधिकारीहरूले जानकारी दिएका छन् ।
राष्ट्रपति रामचन्द्र पौडेलका सञ्चारविज्ञ किरण पोखरेलका अनुसार शपथग्रहण पश्चात् मन्त्रिपरिषद् बैठक बस्नेछ । बैठकको सिफारिसअनुसार राष्ट्रपति पौडेलले प्रतिनिधि सभा विघटन गर्नेछन् ।
मन्त्रिपरिषद्को सिफारिसमा मात्र सदन विघटन हुने संवैधानिक व्यवस्थाअनुसार प्रकृया अघि बढाउन लागिएको राष्ट्रपति कार्यालय स्रोतले जानकारी दिएको छ ।
सानो आकारको मन्त्रिपरिषद् गठन गरी सकेसम्म आजै प्रतिनिधि सभा विघटन गर्ने गृहकार्य भइरहेको छ । मन्त्रिपरिषद्मा को को रहने भन्नेबारे जानकारी प्राप्त भइसकेको छैन ।
सानो मन्त्रीपरिषद्को गठन गरी कार्कीले गृह मन्त्रालयको नयाँ भवनमा गएर पदभार ग्रहण गर्ने बताइएको छ ।
मन्त्रीपरिषद्को पहिलो बैठक शीतलनिवासमै फर्केर बस्ने र उक्त बैठकले पहिलो निर्णयका रूपमा प्रतिनिधि सभा विघटनको सिफारिस राष्ट्रपतिसमक्ष गर्नेछ ।
राष्ट्रपतिले लगत्तै प्रतिनिधिसभा विघटन गरिदिने सहमति जुटेको हो ।
प्रतिक्रिया