काठमाडौं– जेन-जी पुस्ताले मुलुकभर चलाएको आन्दोलनका क्रममा भएको जनधनको क्षतिप्रति नेपाल उद्योग वाणिज्य महासंघले गहिरो दुःख व्यक्त गरेको छ । महासंघले आन्दोलनमा ज्यान गुमाउनेप्रति श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना गरेको छ ।

युवा पुस्ताले मर्यादित रोजगारी, स्वरोजगारी, र सरकारी राजस्वको सदुपयोग जस्ता विषयमा उठाएका चासोप्रति संवेदनशील हुन महासंघले नेपाल सरकार, राजनीतिक दल, र सरोकारवाला सबैलाई आग्रह गरेको छ । महासंघले मुलुकमा थप निराशा र अशान्तिको वातावरण सिर्जना नहोस् र शान्तिपूर्ण आन्दोलनमा अनावश्यक बल प्रयोग नगरियोस् भनी सबैको ध्यानाकर्षण गराएको छ ।

महासंघका अनुसार, सामाजिक न्यायसहितको उच्च आर्थिक वृद्धि भए मात्रै उच्च ज्यालासहितको मर्यादित रोजगारी सम्भव छ । आर्थिक गतिविधिलाई चलायमान बनाउन र पर्यटन सिजनमा नेपालबाट सकारात्मक सन्देश दिनका लागि संयमित भएर संवाद र सहकार्यबाट समृद्धिको बाटोमा अघि बढ्नुपर्नेमा महासंघले जोड दिएको छ ।

भविष्यमा यस्ता घटना दोहोरिन नदिन महासंघले सरकार, राजनीतिक दल, र जेन जी पुस्तालाई अपिल गरेको छ । साथै, नागरिकको सरकारी सेवामा सहज पहुँच, स्वतन्त्र पेसा–व्यवसाय गर्ने अधिकारको सुनिश्चितता, र लगानी एवं रोजगारी प्रवर्द्धनका लागि उपयुक्त वातावरण सिर्जना गर्न पनि महासंघले सबै सरोकारवालालाई आग्रह गरेको छ ।