काठमाडौँ – लागुपदार्थ सेवन (लापसे) गरी सवारीसाधन चलाइरहेका नौ चालकलाई इलाका प्रहरी कार्यालय बनेपाले नियन्त्रणमा लिएको छ ।

आज (मङ्गलबार) दिउँसो ११:३५ देखि बेलुकी २:३० सम्म बनेपा नगरपालिका-१४, साँगा स्थित अरनिको राजमार्ग सडक खण्डमा नेपाल प्रहरी प्रदेश कार्यालय बनेपा काभ्रे, इ.प्र.का. बनेपा काभ्रे, जिल्ला ट्राफिक प्रहरी कार्यालय बनेपा र शिर मेमोरियल अस्पतालबाट खटिएको संयुक्त टोलीले चेकजाँच गरेको थियो ।

यात्रुबाहक सवारीसाधन चलाइरहेका ४० चालकहरुलाइ लागुपदार्थ सेवन गरे/नगरेको सम्बन्धमा चिकित्सक सहितको स्वास्थ्यकर्मीहरुको टोलीले ड्रग्स किट्सको माध्यमबाट पिसाब परीक्षण गरेको थियो ।

सो क्रममा नौ जना चालकहरूले लापसे गरेको प्रमाणित भएको थियो । लापसे गरेका चालकहरूलाई नियन्त्रणमा लिइ थप अनुसन्धान र मुद्दा दायर निम्ति काभ्रेपलाञ्चोक जिल्ला अदालतबाट प्रहरीले पाँच दिन थप म्याद लिएको जानकारी दिएको छ ।