काठमाडौं– पछिल्लो एक सातामा देशभर १ सय ६९ जनामा डेंगुको संक्रमण देखिएको छ । यो सँगै नेपालमा डेंगु संक्रमितको संख्या २ हजार ८ सय ८६ पुगेको छ । 

इपिडिमियोलोजी तथा रोग नियन्त्रण महाशाखा इडिसीडी को तथ्यांक अनुसार सबैभन्दा धेरै गण्डकी प्रदेशमा ८ सय ६७ जनामा संक्रमण देखिएको छ ।

त्यसपछि क्रमशः बागमतीमा ६ सय ३ जना, कोशीमा ४ सय ९९, लुम्बिनीमा ४ सय ४७, सुदूरपश्चिममा ३ सय ४४, कर्णालीमा ७५ र मधेश प्रदेशमा ५१ जनामा डेंगुको संक्रमण पुष्टि भएको इडीसिडीले जनाएको छ । 

वर्षा हुने र घाम लाग्ने हुँदा लामखुट्टेका लागि अनुकूल वातावरण बन्ने भएकाले विशेष गरी साउन, भदौ, असोजमा डेङ्गुको सङ्क्रमण देखिने गर्दछ । यो समया लामखुट्टेको टोकाइबाट बच्न चिकित्सकहरू सुझाउँछन् ।