काठमाडौं– बागमती प्रदेशका निवर्तमान मुख्यमन्त्री बहादुरसिंह लामा समूहमा रहेका नेपाली कांग्रेसका प्रदेशसभा सदस्यहरूले सभापति शेरबहादुर देउवाको उपस्थितिमा भएको भद्र सहमति कार्यान्वयन नहुँदासम्म मुख्यमन्त्री इन्द्रबहादुर बानियाँलाई विश्वासको मत नदिने अडान लिएका छन् । 

मुख्यमन्त्री बानियाँले मंगलबार अपरान्ह ४ बजे बस्ने प्रदेशसभा बैठकमा विश्वासको मत लिने तयारी गरिरहेका बेला लामा समूहमा रहेका १४ जना प्रदेशसभा सदस्यहरू काठमाडौंमै आन्तरिक छलफलमा छन् । 

उनीहरूले तत्कालीन मुख्यमन्त्री लामाले साउन १४ गते मन्त्रीमा नियुक्त गरेका प्रदेशसभा सदस्यहरू पुनः मन्त्रीमा नियुक्त नहुँदासम्म मुख्यमन्त्री बानियाँलाई विश्वासको मत दिन नसकिने अडान लिएका छन् ।  

लामाले प्रदेशसभा सदस्य गोविन्द लम्साललाई आन्तरिक मामिला तथा कानुन, माया श्रेष्ठलाई युवा तथा खेलकुद र गीता गुरुङलाई सहकारी तथा गरिबी निवारणमन्त्री नियुक्त गरेका थिए ।

प्रदेश संसदीय दलको नेतामा पराजित लामाले मुख्यमन्त्रीबाट राजीनामा दिनुअघि सभापति देउवाको निवास बूढानीलकण्ठमा बानियाँसँग आफूले नियुक्त गरेका मन्त्रीहरूलाई शपथ खुवाउनुपर्ने प्रस्ताव गरेका थिए । सभापति देउवाकै अघि राखिएको उक्त प्रस्ताव बानियाँले स्वीकार गरेको लामा पक्षीय नेताहरूको दाबी छ । 

लामापक्षीय सांसद गीता गुरुङले सभापति देउवाको रोहबरमा भएको सहमति कार्यान्वयन हुनुपर्ने आफूहरूको माग रहेको बताइन् । उनले अहिले आफूहरू काठमाडौंमा आन्तरिक छलफलमा रहेको पनि बताइन् । 

‘लामा र बानियाँ दुबै हाम्रा सम्मानित नेता हुनुहुन्छ । अहिले देखिएको हाम्रो आन्तरिक समस्या हो । लामाले मुख्यमन्त्रीबाट राजीनामा दिँदै गर्दा सभापतिज्यूका अगाडि भएको सहमति कार्यान्वयन गर्ने कुरा हो,’ सांसद गुरुङले खबरहबसँग भनिन्, ‘सहमति कार्यान्वयन गरे विश्वासको मत दिइहाल्छौँ नि । बानियाँ हाम्रो मुख्यमन्त्री भइहाल्नुहुन्छ । तर, त्यसका लागि सभापतिज्यूका अगाडि गरेको सहमति कार्यान्वयन हुनुपर्छ ।’

बागमती प्रदेशका नवनियुक्त मुख्यमन्त्री बानियाँले अपराह्न ४ बजे बस्ने प्रदेशसभाको बैठकमा विश्वासको मत प्राप्त गर्ने प्रस्ताव पेस गर्ने सम्भावित कार्यसूची रहेको प्रदेशसभा सचिवालयका सचिव रामकुमार पौडेलले जानकारी दिएका छन् । 

नेपाली कांग्रेस र नेपाल कम्युनिस्ट पार्टी (एमाले)का ६४ जना प्रदेशसभा सदस्यको समर्थनमा कांग्रेस बागमती प्रदेशका सभापतिसमेत रहेका बानियाँ साउन २० गते मुख्यमन्त्रीमा नियुक्त भएका थिए । 

मुख्यमन्त्रीमा नियुक्त भएको एक सातापछि मुख्यमन्त्री बानियाँ मंगलबार विश्वासको मत लिन लागेका हुन् । मुख्यमन्त्रीमा नियुक्त भएको ३० दिनभित्र प्रदेशसभाबाट विश्वासको मत लिइसक्नुपर्ने व्यवस्था छ ।