काठमाडौं– भानु जयन्तीको पूर्वसन्ध्यामा विराटनगर प्रज्ञा प्रतिष्ठानले शनिबार विराटनगरमा भानु रथयात्रा निकालेको छ ।

आदिकवि भानुभक्त आचार्यको २ सय १२ औं जन्म जयन्तीको अवसरमा आदिकवि भानुभक्तको तस्विर सहितको रथ यात्रा निकालिएको हो । रथयात्राले विराटनगर महानगरपालिका कार्यालयबाट शुरु भएर नगरको विभिन्न भाग परिक्रमा गरेको थियो ।

सो क्रममा भानुभक्त आचार्यको जीवनी, व्यक्तित्व र कृतित्वका साथै नेपाली भाषामा उनले पुर्‍याएको योगदान बारेमा चर्चा गरिएको थियो ।

विराटनगरमा रहेका साहित्यकारहरुको बाक्लो उपस्थिति साथै विद्यार्थीहरूको सहभागितामा र्‍याली साथै भानुभक्तको विषयमा जानकारी गराइएको  थियो । रथ यात्रामा साहित्यकार, कलाकार, विद्यार्थी र कर्मचारीहरूको सहभागिता रहेको थियो ।

नेपाली साहित्यका आदिकवि भानुभक्त आचार्यको जन्मजयन्ती असार २९ गते आइतबार देश विविध कार्यक्रमको आयोजना गरी मनाइँदैछ ।