दुबईः युएईले ओमानको सल्तनतमा भएको गम्भीर ट्राफिक दुर्घटनामा घाइते भएका युएई नागरिकहरूलाई उद्धार गर्न सीमापार एयर एम्बुलेन्स सञ्चालन गरेको छ ।

युएई नेशनल गार्डको राष्ट्रिय खोज तथा उद्धार केन्द्रको नेतृत्वमा मिसन सुरु भएको हो । युएईको वायुसेना तथा वायु रक्षा कमाण्ड, परराष्ट्र मन्त्रालय र मस्कटस्थित युएई दूतावाससँग समन्वयमा मिसन सञ्चालन गरिएको छ । ओमानमा प्रारम्भिक उपचारपछि पीडितहरूलाई निरन्तर चिकित्सा हेरचाहको लागि फुजैराहको शेख खलिफा अस्पताल पु¥याएको थियो ।

दुर्घटनामा कयौंको मृत्यु भएको थियो भने धेरै गम्भीर घाइते भएका थिए । उद्धारको क्रममा युएई कूटनीतिक नियोगलाई आवश्यक सहयोग प्रदान गर्ने ओमानी समकक्षीहरूको द्रुत र प्रभावकारी सहयोगका लागि युएईका अधिकारीहरूले प्रशंसा गरेका छन् ।

संयुक्त विज्ञप्तिमा, राष्ट्रिय गार्ड र परराष्ट्र मन्त्रालयले मृतकका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ । युएईस्थित परराष्ट्र मन्त्रालयले विदेश यात्रा गर्दा सडक सुरक्षा कानूनको पालना गर्नुपर्नेमा जोड दिएको छ । नागरिकहरूलाई विशेष गरी जमिनमाथि गाडी चलाउँदा सावधानी अपनाउन आग्रह गरिएको छ ।

तथ्याङ्क

सन् २०२४ को तथ्याङ्क अनुसार युएईमा सडक दुर्घटनामा ज्यान गुमाउनेको सङ्ख्या ३८४ पुगेको छ । यो तथ्याङ्क सन् २०२३ को तुलनामा ९ प्रतिशतले वृद्धि हो । यी मध्ये लगभग आधा मृत्यु दुबईमा रेकर्ड गरिएको छ ।

गृह मन्त्रालयको २०२४ को सडक सुरक्षा तथ्याङ्क अनुसार, घाइतेहरूको सङ्ख्या बढेर ६,०६२ पुगेको छ भने ४,७४८ जना ठूला दुर्घटनामा घाइते भएका छन् । तुलनात्मक रुपमा यो ८ प्रतिशतले वृद्धि हो । मृत्यु हुनेहरूमध्ये, हलुका सवारी साधन दुर्घटनामा २२३ जनाले ज्यान गुमाएका छन् भने मोटरसाइकल दुर्घटनामा ६७ जनाको मृत्यु भएको तथ्याङ्कले देखाएको छ ।